Ақмола облысында суға батып кетті деген адам тірі табылды
Ер адам жыра-жықпылдың арасында 1,5 күн отырған.
Ақмола облысы Атбасар ауданында тасқын кезінде суға батып кетті деген ер адам тірі табылды, деп хабарлайды Malim.kz.
Бұл туралы облыстық ТЖД мәлім етті.
Жабай өзенінің тасуы салдарынан су басқан учаскеде 1977 жылғы ер адам батып кетті деген күдікпен кеше ақмолалық құтқарушылар шақырылған болатын.
Бірінші күнгі іздеу жұмыстары еш нәтиже бермеді. Бірақ бүгін таңертең ер адам бұталардың арасынан тірі, аман-сау табылды. Құтқарылған адам сүңгуір костюмдерін киген құтқарушыларды көріп қуанып кеткен. ТЖД қызметкерлері оны тамақтандырып, құрлыққа жеткізді. Ер адам жыра-жықпылдың арасында 1,5 күн отырған, – деп хабарлады Ақмола облысы ТЖД баспасөз қызметі.
Ер адамның су басқан учаскеге не үшін және қалай барғанын қазір Атбасар ауданының полиция бөлімі анықтап жатыр.
Фото: Ақмола облысы ТЖД
