Прокурор «қыз зорлады» деп айыпталған полиция бастығын 12 жылға соттауды сұрады

Прокурор Талдықорған қалалық Полиция басқармасының бұрынғы бастығы Марат Көштібаевты 12 жылға бас бостандығынан айыруды сұрады, деп хабарлайды Malim.kz.

Ол облыс орталығының 27 жастағы тұрғынын зорлады деген күдікпен ұсталған болатын. Кейін сот тергеу органдарының тиісті өтінішхатын қанағаттандырып, полиция бастығы қамауға алынды.

Бұл іс бойынша Ішкі істер министрі Ержан Сәденов пікір білдірді.

Ел азаматтарының конституциялық құқықтарын қорғайтын полиция қызметкері үшін заң мен тәртіп бірінші орында болуы керек. Құқыққа қайшы келген азаматтар мен полицейлердің заңсыз әрекетіне тосқауыл қойылуы тиіс. Заң бәріне ортақ, - деп атап өтті министр.

Сондай-ақ Ішкі істер министрінің бірінші орынбасары Марат Қожаев та әріптесінің қыз зорлау оқиғасына қатысты түсініктеме берді.

Әрине, ондай жұмыстар осы уақытқа дейін жүргізіліп келеді. Бірақ өкініштісі сол, кейде осындай жағдайлар болады. Бұл туралы айту да өте жағымсыз. Біз мұндай оқиғалар үшін жауапкершілігімізді толық түсінеміз, - деді ол Сенат кулуарында.

Фото: интернеттен