Қордай қақтығысы. Үкім және қарсылық: "Мен кімге сенемін, бұл қандай сот?"

Қордайдағы ұлтараралық жанжалға байланысты сот үкімі оқылғаннан кейін ең ауыр жаза алған айыпталушы Жұмахан Ботабасовтың туыстары соттың әділетсіз өткенін айтып шағымданды.

Жұмахан Ботабасовтың туысы Ерхат Ботабасова бауырымды ешқандай дәлелсіз, әділетсіз соттады дейді.

«62 жастағы менің бауырым Ботабасов Жұмаханға ең ауыр жаза - 20 жыл түрме беріліп отыр. Ешқандай дәлелсіз, дәйексіз жаза беріліп отыр. Мен соған күйіп тұрмын. Бірақ мына жерде мен сенетін ешнәрсе қалған жоқ. Бауырым мектепте жүргізуші болып жұмыс істейді. Сол күні құрдасы Қаржаубай аға құран оқып бер деп үйіне шақырған. Соған барады. Оның (Ботабасовтың - ред) баласы ДЦП болып ауырады. Көпшілікпен бірге баласы еріп кеткен сол күні. Ол жерге баласын іздеп барған. Содан осыған ілініп қалып отыр», - дейді Ботабасова.

Ерхат Ботабасованың сөзінше, Қордай қақтығысы бойынша істі болған өзге айыпталушыларға тергеушілер «Ботабасов атты деп айтсаңдар, жазаларың жеңілдейді» деп айтқан. Оны айыпталушылардың бірі сотта мәлімдеген. Бірақ ол адамның өзін 5 жылға түрме жазасына кескен.

«Ұсталған балаларға «сендер Ботабасов атты деп айтсаңдар, жазаларың жеңілдейді» деген. Сот жүріп жатқанда Алмас Әубәкіров «мені ұрып-соққаннан кейін айттым, бірақ ағаны (Ботабасовты – ред) көрген жоқпын» деп айтыпты. Ол бала осылай деп айтқаны үшін бес жыл түрмеге қамалды...Ешқандай дәлелсіз, ең ауыр жазаны менің бауырыма беріп отыр. Сонда мен кімге сенемін, бұл қандай сот?», - дейді Ботабасова.

Сәуірдің 27-і күні Таразда Қордай қақтығысына қатысы бар деп айыпталған 51 адамға сот үкімі оқылды. Айыпталушылардың алды сот залынан босатылса, арты 20 жылға түрме жазасына кесілген.

Қордайдағы ұлтаралық жанжалға қатысты сот процесі 2020 жылдың желтоқсан айында басталған. Сотқа 51 айыпталушы және 60-тан астам адвокат қатысқан.

Айыпталушыларға ҚР Қылмыстық кодексінің «Адам өлтіру» (99-бап), Қарақшылық (192- ба), Қорқытып алу (194-бап), "Жаппай тәртіпсіздік" (272-бап), "Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру" (287-бап) бойынша айып тағылған.

2020 жылдың 7 ақпанында Жамбыл облысының Қордай ауданында қазақтар мен дүнгендер арасында қақтығыс болып, салдарынан 11 адам көз жұмған. Тергеу барысында 120-дан астам қылмыстық іс қозғалған. Ресми мәлімет бойынша, жанжал кезінде 164 үй мен сауда орыны және 100 автокөлік қираған. 342 адам жәбірленуші деп танылған.