2025 жылғы 23 сәуірде Түркияның Ыстамбұл қаласында 6,2 магнитудалы күшті жер сілкінісі тіркелді, деп хабарлайды Malim.kz.
Жергілікті БАҚ мәліметінше, 151 адам жарақат алған, алайда қаза тапқандар жоқ. Бұл туралы қала басшылығы мәлімдеді.
«Қауіптеніп, биіктіктен секірген 151 азаматқа медициналық көмек көрсетіліп жатыр. Олардың өміріне қауіп жоқ. Қайтыс болғандар жоқ. Жалпы алғанда, тұрғын үйлерге айтарлықтай зақым келген жоқ. Тек Фатих ауданында бір ескі ғимарат құлаған. Бұл оқиғада ешкім зардап шеккен жоқ», – делінген Habertürk телеарнасы таратқан хабарламада.
Сондай-ақ, губернатордың айтуынша, жер сілкінісінен кейін электрмен жабдықтау, газ инфрақұрылымы, сумен қамту мен кәріз жүйесіне қатысты ешқандай қауіпсіздікке әсер ететін жағдай тіркелмеген.
Түркия президенті Режеп Тайып Ердоған Ыстамбұл тұрғындарына қолдау білдіріп, жағдайды жіті бақылап отырғанын және тиісті министрліктер мен ведомстволардан толық ақпарат алғанын жеткізді.
Жер сілкінісі 23 сәуір күні сағат 12:49-да Ыстамбұл маңында тіркелген. Алғашқы сілкіністерден кейін бір сағат ішінде кем дегенде жеті афтершок болғанын мамандар растады.
Фото: Pixabay.com
