Наурыз мейрамына челлендж: ұлттық күй бір уақытта ойнайды
Республикалық челлендж 20 наурыз күні сағат 12:00-де өтеді.
Еліміздің барлық білім беру ұйымында ұлттық күй бір мезетте ойнайды, деп хабарлайды Оқу-ағарту министрлігі. Наурыз мейрамына арналған республикалық челлендж 20 наурыз күні сағат 12:00-де өтеді.
«Домбырашылар челленджінің мақсаты - балалар мен жастардың, мұғалімдер мен ата-аналардың музыкадағы шығармашылық жетістіктерін көрсету және домбыраны дәріптеу. Шараға барлық ниет білдіруші қатыса алады. Бұл челлендж былтыр алғаш рет өтті. Домбыраның күмбірлеген үні бір уақытта барлық білім беру ұйымында ойнады. Бұл – еліміздің мәдени өмірі үшін елеулі оқиға. Шара «Біртұтас тәрбие» бағдарламасы аясында өткізіледі», - дейді Тәрбие жұмысы және қосымша білім беру департаментінің директоры Меруерт Медетбекова.
Айта кетейік, биыл Наурыз мейрамы еліміздің барлық жалпы білім беретін мектебінде 14-23 наурыз аралығында өтеді. Осы күндері тақырыптық челлендж, жалпыұлттық экологиялық акция және ұлттық ойыннан түрлі жарыс ұйымдастырылады.
