«Лайк баспағаны үшін сөгіс алды»: әкімдік пікір білдірді

Жастар ресурс орталығы қызметкерлері әлеуметтік желіде басшылықтың әрекетіне шағымданды, - деп хабарлайды Malim.kz тілшісі.

Facebook-те орталықтың әлеуметтік желідегі жазбаларына лайк қоймаған қызметкерлер жазбаша сөгіс пен ауызша ескерту алғаны айтылған жазба тарады. Шымкент қаласының әкімдігі бұған қатысты пікір білдірді. 

"ЖРО-дағы жағдай — бұл екі қызметкер арасындағы жұмыс дауы. Мұндай мәселені ұжым ішінде, маған жүгініп-ақ шешуге болатын еді. Бірақ оның орнына бұл әлеуметтік желіде тарап кетті. «e-Өтініш» платформасы арқылы ресми шағым тек жарияланымнан кейінгі күні ғана түсті, — деді Ішкі саясат және жастар істері басқармасының басшысы Айгерім Жұмакұлова.

Сонымен қатар, Жұмакұлова ЖРО басшысының қызметкерлерден әлеуметтік желіде белсенді болуды талап еткенін растады. Сол үшін оған жаза қолданылған.

"ЖРО басшысының әлеуметтік желідегі белсенділікті талап етуі — орынсыз әрекет деп танылды. Оған тәртіптік жаза қолданылды", — деді басқарма басшысы.

Еске салайық, жыл басында Жамбыл облысының әкімі Ербол Қарашөкеевтің жариялаған жазбасы әлеуметтік желіде пікірталас тудырған еді. Қарашөкеев Instagram-парақшасында 2025 жылды Жамбыл облысында «Кітап жылы» деп жариялағанын айтып, Жаңа жыл мерекесінде Шерхан Мұртазаның «Ай мен Айша» романы мен ақын Күләш Ахметованың «Құт» атты өлеңдер жинағын оқығанын жазған. Бұл жазбаға қоса жарияланған сурет желі қолданушылары арасында қызу талқылауға түсті.

Сол арада Су ресурстары және ирригация министрі Нұржан Нұржігітов Қарашөкеевке қатысты сын жазылған жазбаға неге лайк қойғанын түсіндіруге мәжбүр болған.

Фото: Pixabay.com