Мәжілістің үш депутаты талап қойған жаңаөзендіктерді райынан қайтара алмады

Астанада Энергетика министрлігінің алдында наразылық білдіріп тұрған маңғыстаулық жұмыссыздарды полицияның күштік жасағы тұтқындап әкетті. Жаңаөзеннен арнайы барып, мұнай компаниясынан жұмыс сұрағандармен Мәжілістің үш депутаты барып тілдесіп қайтқан. 

Алайда Ермұрат Бәпи, Ринат Зайытов, Мақсат Толықбай қанша тырысса да жаңаөзендіктерді райынан қайтара алмаған алмаған сыңайлы.  

Жаңаөзендегі «БерӘлі Маңғыстау Company» мекемесі «Өзенмұнайгаз» АҚ жариялаған биылғы тендерде жеңілген. Осыдан кейін негізгі табысынан қағылған серіктестік жүзден астам жұмысшысын жұмыстан қысқартуға мәжбүр болды. Ал жұмыссыз қалғандар өз сәуір айының басында «Өзенмұнайгаз» АҚ штатына жұмысқа алуды сұрап, талап қойған. «Кезби» ЖШС жұмыс ұсынылғанымен олар келісім бермеді. Арнайы келген жаңаөзендіктер мәселе  шешілмесе, Маңғыстауға кетпейтінін де айтқан еді. Бірақ олардың талабын ескерместен күштік құрылым өкілдері автобусқа салып алып кетті.  

«Қазмұнайгаз» ҰК» АҚ еншілес компанияларының штатына жұмысшы алуға 2014 жылдан бері шектеу қойылған. Содан бері Маңғыстау облысындағы мұнай компанияларына тек жұмысшларды аутсорсинг арқылы ғана алады. Олардың арасында штаттық құрамға өткендер өте аз. Ал штатқа алынбаған жұмысшыларға әлеуметтік көмек, басқа да төлемдер берілмейді әрі шаттағылармен салыстырғанда еңбекақысы едәуір төмен. Бұл жағдай үнемі жұмысшылар арасында мәселе тудырып, наразылықтарға әкелетін жағдайлар жылда қайталанады.