Н.Әлтаев А.Мырзахметов ісі бойынша күдікті деп қамауға алынды
Сыбайлас жемқорлыққа қарсы іс-қимыл агенттігі таңертең бұрынғы депутат Нұржан Әлтаевқа қозғалған қылмыстық іске байланысты хабарлама таратты.
Осыдан екі ай бұрын «Атамекеннің» бұрынғы басшысы Абылай Мырзахметов «алаяқтық жасады», «кәсіпкерді оның туысын қылмыстық жауапкершіліктен босатуға жәрдемдескені үшін аса ірі көлемде пара беруге итермелеген» деген күдікпен қамауға алынған. Іс барысында «Нұржан Әлтаев Еңбек және әлеуметтік қорғау вице-министрі, кейіннен парламент мәжілісінің депутаты ретінде жүйелі түрде «Атамекен» ұлттық кәсіпкерлер палатасының басқарма төрағасы Абылай Мырзахметовтен аса ірі мөлшерде пара алған деген күдігіне ілінген» деп жазылған агенттіктің хабарламасында.
Тергеудің болжамынша, «заңға қайшы әрекет» 2018-2020 жылдары болған. Агенттік Әлтаев «Мырзахметовтің мүддесі үшін әрекет етті», «мемлекеттік тапсырыстарды алуына ықпал етіп, жалпы қамқоршылық көрсеткен болуы мүмкін» деп болжап отыр.
Ол жылдары Н. Әлтаев Еңбек және халықты әлеуметтік қорғау вице-министрі, Парламенті Мәжілісінің VI шақырылымының депутаты, Аграрлық мәселелер комитетінің мүшесі, Өнеркәсіпшілер мен кәсіпкерлер одағы басқармасының төрағасы қызметтерін атқарған.
Бірнеше жыл бұрын мәжілістен қуылған Нұржан Әлтаев кейінгі кезде «Ел тірегі» партиясын құруға әрекеттеніп, билікті жиі сынай бастаған. Соңғы парламент сайлауында өзін-өзі ұсынушы ретінде мәжіліске өтпеген Әлтаев сайлаудағы заңсыздықтар туралы айтқан «Халық парламентіне» мүше болған.
Бір күн бұрын оның ұсталғаны туралы ақпарат тарағанда кейбір белсенділер істен саяси астар іздеген.
Әзірге Н. Әлтаевтың адвокаты немесе жақындары ақпарат құралдарына пікір білдірген жоқ.
MalimBlocks
