Журналистерге қауіп төндірген Клебанов жындыханаға жіберілді

Журналистердің кәсіби қызметіне кедергі келтірді деп айыпталған Аркадий Клебанов   психиатриялық клиникаға жатқызылды. 

Сот жеке өмірге және дербес деректерге қол сұқты, кәмелетке толмағандарды қылмыстық құқық бұзушылық жасауға тартты, бөтеннің мүлкіне қасақана зақым келтірді деген айыппен Клебанов туралы істі қарады.

Жәбірленушілер полиция органдарына журналистерге қауіп-қатер төндіру, бұзақылық жасау, мүлікті зақымдау және жою деректері бойынша белгісіз тұлғаларға қатысты өтінішпен жүгінген.

Тергеу барысында 6 тұлғаның қылмысқа қатысты екені анықталды. Сонымен қатар,  күдіктілердің біріне екі сот-психиатриялық сараптамасы жүргізілді. Қорытындыларға сәйкес Клебанов созылмалы психикалық дертке шалдыққаны анықталды.
Сотқа дейінгі тергеп-тексеру қорытындысы бойынша оған қатысты материалдар мәселені қарастыру және медициналық сипаттағы еріксіз емдеу шараларын қолдану үшін сотқа жіберілді.

Еске салайық, биыл наурыз айында журналистерге жасалған шабуылдардың тапсырыс берушісі қолға түскен болатын. Кейін жәбірленушілердің өтініші бойынша А.Клебановқа қатысты сот отырысы жабық режимде өтетіні белгілі болды.