Ақтөбе облысында жалақыларын 100 пайызға өсіруді талап еткен мұнайшылар бүгін бесінші ереуілге шықты. Наразылыққа шыққан “КМК Мұнай” компаниясының 200-ге жуық жұмысшысшыларына бүгін мастерлер мен бригадерлер де қосылыпты.
«Қаладағы үлкен бастықтар, компанияның вице-президенті инженерлік- техникалық құрамға “үш күнге келіп, жұмыс тоқтатпай, жұмысшылардың орнына жұмыс істей тұрыңдар, сол жақты бақылаңдар” деп айтқан. Енді бұлар да бүгін жұмыстарын тастады. Жұмысшылармен біргеміз деп бізге қосылды. Өйткені мәселемізді ешкім шешкен жоқ. Олар да біздің талабымыздың орындалғанын сұрап тұр. Қазір 230 адам тұрмыз», - дейді Руслан есімді мұнайшы Мalim.kz сайтының тілшісіне.
Мұнайшылардың айтуынша кенішке жіберілген инженерлік техникалық құрамды қазандықтарды, ұңғымаларды бақылап отыруға шақырған. Қазір кеніште жұмыс толық тоқтаған.
«Бастықтар бұл жаққа енді кімді жіберетіндерін білмей жатқан шығар. Әзірге ешқандай жаналық жоқ. Бес күннен бері не қытайлық компанияның басшылары не облыс әкімдігінен бірде бір адам келген жоқ. Мәселемізді ешкім келіп тыңдамады. Біз аяғына дейін барамыз. Талап орындалмайынша жұмысқа шықпаймыз», -дейді бес күннен бері ереуілдеп тұрған Мұстафа есімді мұнайшы.
Бұған дейін мұнайшылардың қытайлық «КМК Мұнай» компаниясына қойған төрт талаптарын жазған болатынбыз. Біріншісі –жалақыларын жүз пайызға өсіру. Екіншісі – жататын жерлерін кеніштен алыстау жерге көшіріп, асханадағы ас мәзірін жақсарту. Үшіншісі – кәсіподан жұмысы, ал соңғысы- басшылықтан көретін қысымды тоқтату.
Фото автордікі.
