Сәуірдің 1-і күні Нұр-Сұлтанда бір топ ана Конгресс хол сарайының алдында наразылық акциясына шығып, биліктен көпбалалы, мүгедек балалары бар отбасыларға арзан бағада несиеге үй беруді, әр балаға 42 500 теңгеден жәрдемақы тағайындауды талап етті.
Жиынға қатысқан аналардың бірі Назира Мұқашеваның сөзінше, олар билік талаптарын орындамаған соң осылай көшеге шығуға мәжбүр болған.
«Біз қалалық әкімдікке 15 күн қонғанда да осы талаптарды қойғанбыз. Әр балаға, бала санына қарамастан 42 500 теңге жәрдемақы тағайындау, әлеуметтік аз қамтылған отбасыларға арзан бағамен үй беру және отбасыға қатысты қаралып жатқан заңды мүлдем алып тастауды талап етеміз... Біз 15 күн әкімдікке қонғаннан бері осы мәселелерді көтеріп келеміз. Бірақ осы уақытқа дейін біз нақты жауап алған жоқпыз», - деді Мұқашева.
Наразылармен кездесуге Нұр-Сұлтан қаласы ішкі саясат басқармасының басшысы Дәурен Бабамұратов шықты. Ол бұл шараның заңсыз екенін, әйелдердің талаптарын білетінін және баспана мәселесін әкімдік қарастырып жатқанын айтты.
