Әкім Сақтағановтың салғырттығы

Семей қаласының әкімі қызметіне тағайындалғанына үш айды артта қалдырған Нұрымбет Сақтағановтың әлі күнге дейін мұрнына су жетпей жүр. Обалы қане, қаланың «свежи» басшысы Семейдің барлық аймақ-аудандарында болып, жұртпен кездесіп жатса да не «қиратып», не ширатып жатқан ісі көзге шалынатын емес. Оның бір жағы нақты командасын дұрыс қалыптастыра алмаудан шықса, екіншісі өзінің қалада бар екендігін таныта алатын, айтуға тұратын істерін әлеуметтік желіде болсын, дұрыс көрсете алмауынан шығады.

Шындығы керек, 2018 жылдың күзінде Семей төрінде Әлихан Бөкейхановтың ескерткіші қойылып, соған облыс әкімінің сол кездегі идеология жөніндегі орынбасары ретінде келген Нұрымбет Аманұлы шешендігімен, қағазға қарап кібіртіктеп тұрмайтындығымен көзге түскен болатын. Уақыт өтті, бірнеше жыл Ұлан ауданының әкімі қызметін атқарды. Бірақ, семейліктер көңілінде Сақтағановтың сол бейнесі бүгінге дейін сүйкімін жоғалтқан жоқ еді.

Ал жыл басынан ауғанда қала басшылығына тағайындалған Н. Сақтағанов сол кездегі идеологиялық қырғылығына сызат түсіріп алған жайы бар. Апта ішінде күн сайын қаланың қай түкпірінен табылғандығын әлеуметтік желіде әйгілеп жүретін «әйдік» әкім кейбір көше атауларының ерсі көрінетініне салғырт қарап жүрген сыңайлы.

Соның бір ғана нақты көрінісін қала орталығындағы Алаштың ардақты жазушысы Жүсіпбек Аймауытовтың атына берілген көшенің қарсы бетіндегі тақтайшадан Шмидттаның, енді бірде Достоевский, тіпті бірде «көше Аймауытованың» кездесетіні... Демек, қала көшелерінің нақты атаулары тәуелсіздік алғанымызға отыз жылдың жүзі болса да әлі күнге өз жөнін дұрыс қалыптастыра алмағаны көрініп тұр. Шын мәнінде бұл қала әкімі Нұрымбет Сақтағановтың емес, оның әлеуметтік және идеологиялық жөніндегі орынбасары Айдар Садырбаевтың салғырттығы, қалалық Мәдениет және тілдерді дамыту бөлімінің басшысы Назерке Аққожинаның дәрменсіздігі деген жөн шығар.

Ал, жақында облыстық тілдерді дамыту басқармасы таратқан мәліметке сүйенсек,  2021 жылы облыс бойынша 90 көше атауы өзгертіліпті. Оның ішінде: идеологиялық тұрғыдан ескірген - 39 көше, тарихи және географиялық атаулар қайтарылғаны - 16, жалпы атаулар берілгені - 35, танымал тұлғалардың есімдері берілгені - 41 көше бар.

«Елді мекендердің, нысандардың, көшелердің және құрамдас бөліктерді қайта атау және оларға атау беру кезінде халықтың этникалық құрамы, жұртшылықтың пікірі ескеріледі және барлық рәсімдер қатаң түрде заңнамаға сәйкес жүргізіледі. Облыста тіл саясатын жүзеге асыру бойынша жұмыстар жалғасын табатын болады», - деп нығаралаған болатын аталған басқарма өкілі Толқын Берікбекова.

Сонымен қатар, былтыр облыс бойынша 157 көше, 2 елді мекен және 21 нысанның атауы бұрынғы «тарихи атауымен» қоштасқан. Оның ішінде: идеологиялық тұрғыдан ескірген - 65 көше, тарихи және географиялық атаулар қайтарылғаны - 35, жалпы атаулар берілгені - 57, танымал тұлғалардың есімдері берілгені - 63 көше екен.

Енді, Семей қаласының мәдениет және тілдерді дамыту бөлімінің тілдерді дамыту секторының бас маманы Айгерім Байжұманованың мәлімдемесіне зер салайық.

«Жалпы,  Семей қаласы бойынша, 1000-нан астам  көше бар. Ономастика мәселесі бүгінгі күнгі өзекті екені рас. Сондықтан бұл саладағы жұмыстарды халықтың пікірін ескере  отырып жүргізу жолға қойылған.