Алматы бюджеттің 124 млн теңгесіне форум өткізбек

«Almaty Creative Industries Forum - 2021» осы жылдың III-IV тоқсанына жоспарланған. Оның аясында стартаптардың акселерациясы мен Creaton чемпионаты өткізіледі. Қазір креативтік индустриялар басқармасы іс-шараны ұйымдастырып беретін компания іздестіруде.

– Бұл форумды өткізудің негізгі міндеті Алматы қаласында және жалпы елде креативтік экономика саласының қалыптасуы мен дамуына жәрдемдесу, халықаралық ынтымақтастықты дамыту және тәжірибе алмасу, креативтік индустриялар саласында жаңа жобаларды іздеу және іске қосу болып табылады, – деп түсіндірді басқарма іс-шараны неге өткізу керектігін.

Форумға кемінде он спикер,  оның ішінде креативтік экономика саласындағы бес халықаралық сарапшының қатысады.

Бұдан бөлек, басқарма «Almaty Creative Class» онлайн білім беру платформасын іске қосып, контентпен толтыру үшін  38,8 миллион жұмсағалы тұр. Ол да бюджеттік ақша.  Бұл қаражатқа креативті экономиканың басым бағыттары бойынша үш тілде 10 оқыту курсы түсіріледі.

Естеріңізге салсақ, наурыз айында мемлекет басшысы Алматы қаласын одан әрі дамыту үшін жаңаша түрленген экономикаға назар аудару керектігін айтқан. Жақында қала әкімі Бақытжан Сағынтаев танымал тиктокерлермен онлайн кездесу өткізіп, креативті индустрияны дамытудың бағыттарын талқылады. 

Аделаида Ауеспекова, Алматы қаласы