Талдықорған қаласында асханалардың бірінде болған тұрмыстық жанжал қайғылы жағдаймен аяқталып, әйел адам көз жұмды, деп хабарлайды Malim.kz.
Алдын ала мәліметтерге сәйкес, жанжал барысында күдікті жәбірленушіге пышақ жарақатын салған. Зардап шеккен әйел жедел түрде медициналық мекемеге жеткізілгенімен, дәрігерлер оның өмірін сақтап қала алмады.
Жетісу облысының полиция департаменті аталған деректі растады. Қазіргі уақытта «Адам өлтіру» бабы бойынша сотқа дейінгі тергеу басталған.
«Алдын ала мәлімет бойынша, тұрмыстық жанжал кезінде күдікті жәбірленушіге пышақ жарақатын салған. Күдікті ұсталып, қамауға алынды. Оқиғаның барлық мән-жайын анықтауға бағытталған тергеу әрекеттері жүргізілуде», – деп хабарлады полиция департаменті.
Ведомство өкілдері тергеу мүддесіне байланысты өзге ақпараттың жария етілмейтінін атап өтті.
Әлеуметтік желілердегі ақпаратқа сәйкес, жәбірленуші ауруханада қайтыс болған. Сондай-ақ күдіктінің бұған дейін де адам өлтіру дерегі бойынша сотталғаны айтылуда.
Қазіргі таңда құқық қорғау органдары оқиғаның толық мән-жайын анықтап жатыр.