Қостанай облысында әйел кәмелетке толмаған ұлын белдікпен ұрғаны үшін сотқа тартылды. Оған 390 мың теңгеден аса айыппұл салынған. Бұл туралы Stan.kz сайты “Ақжайық” басылымына сілтеме жасап хабарлады.
Сотта анықталғандай, әйел жасөспірімді тәрбиелеу мақсатында оны белідікпен арқасынан ұрған. Келесі күні бала мектепке келіп, денесіндегі көгерген жерлерді сыныптастарына және мұғалімдерге көрсеткен. Отбасы бұған дейін де кәмелетке толмағандар істері жөніндегі комиссияның бақылауында болғандықтан, мектеп басшылығы бірден қорғаншылық органдарына хабарласқан.
Мектеп директоры Ирина Шушпанова ұрып-соғу оқиғасы алғаш рет емес екенін, сондай-ақ отбасыдағы жағдайды бақылау қажеттігі туралы ресми қаулы бар екенін айтты.
Сот отырысында айыпталушы ұлының мінез-құлқы күрделі екенін тіл алмағанын, үйден қашып кеткенін және оқудан бас тартқанын айтты. Ол зорлық-зомбылықты жүйелі түрде қолданғанын жоққа шығарып, баласын үнемі дәрігерге апарып, оның эмоциялық тұрақсыздығын еңсеруге тырысқанын жеткізді. Қорғау тарапы отбасындағы жалпы ахуалдың оң екенін көрсететін психологтың қорытындысын ұсынды. Ал кәмелетке толмағандарды бейімдеу орталығының өкілі, қазір сол жерде уақытша жатқан баланы отбасына тезірек қайтару қажет екенін айтты.
Соған қарамастан, сот әйелді кәмелетке толмаған баласына дене ауырсынуын келтірген, бірақ денсаулығына жеңіл зиян келтірмеген ұрып-соғу фактісі бойынша кінәлі деп таныды. Нәтижесінде оған 100 айлық есептік көрсеткіш мөлшерінде 393 200 теңге айыппұл түріндегі әкімшілік жаза тағайындалды.