Ливан аумағында Израиль армиясының шабуылдары салдарынан қаза тапқандар саны 2 759 адамға жетті, деп хабарлайды Malim.kz.
Ливан Денсаулық сақтау министрлігі 2 наурыздан бері жалғасып жатқан Израиль шабуылдарынан зардап шеккендер туралы жаңартылған мәлімет жариялады. Ведомство дерегінше, осы уақыт аралығында қаза тапқандар саны 2 759-ға, ал жараланғандар саны 8 512 адамға жеткен. Бұған дейін министрлік Израиль шабуылдары салдарынан 2 727 адамның қаза тапқанын хабарлаған еді.
2 наурызда Израиль әскері Ливан аумағына қарқынды әуе соққыларын бастап, елдің оңтүстігіндегі бірнеше елді мекенді бақылауға алған.
Ливан үкіметінің мәліметінше, қақтығыс салдарынан ел ішіндегі босқындар саны 1 миллионнан асқан.
Бұған дейін АҚШ президенті Дональд Трамп 17 сәуірде күшіне енген Израиль мен Ливан арасындағы 10 күндік уақытша бітім тағы үш аптаға ұзартылғанын мәлімдеген болатын.