Биылдан бастап елімізде Наурыз мейрамы жаңа форматта тойланады. Мәдениет және ақпарат министрлігі жыл сайын 14-23 наурыз аралығында өтетін Наурызнама онкүндігін жариялауды ұсынып отыр.
Мәдениет комитеті төрағасының орынбасары Сәбит Барлыбаевтың айтуынша, Наурыздың бірегей логотипі бекітіліп, еліміздің барлық аймағына жіберілген.
«Тарихта Наурызды тойлау 8-9 күнге жалғасқан. Оны «Наурызнама» деп атаған. Бұл туралы деректер ұлы философ-жазушыларымыз Махмұд Қашқари, Мәшһүр Жүсіп Көпейұлы, Абай Құнанбайұлы, Мұхтар Әуезов еңбектерінде жазылған», - деді С.Барлыбаев орталық коммуникациялар қызметінде өткен брифингте.
Наурызнама онкүндігінің бағдарламасы:
- 14 наурыз – Көрісу күні – Амал мерекесі деп аталады. Бұл дәстүр негізінде еліміздің батыс өңірлерінде сақталған. Бүгінгі күні аталған мерекені барлық аймақта тойлау ұсынылды.
- 15 наурыз - «Қайырымдылық күні». Бұл күн ел бойынша қайырымдылыққа, мейірім мен тату көршілікке арналады.
- 16 наурыз - «Мәдениет және ұлттық салт-дәстүр күні». Бұл күні мәдениет, өнер мен ұлттық құндылық насихатталады.
- 17 наурыз - «Шаңырақ күні». Осы күні отбасылық құндылықты дәріптеуге, өнегелі ұрпақ тәрбиелеген үлгілі отбасыға арналған мәдени іс-шаралар өтеді.
- 18 наурыз күні - Ұлттық киімдерге арналады. Барлық өңірде ұлттық киімдерді насихаттауға бағытталған түрлі іс-шара өткізу ұсынылып отыр.
- 19 наурыз – Жаңару күні. Көктемгі ағаш егу дәстүрін жалғастыру ұсынылды.
- 20 наурыз - Ұлттық спорт күні. Бұл күні елдің барлық аймағында ұлттық спорттан түрлі жарыс ұйымдастырылады.
- 21 наурыз - Ынтымақ күні. Халық арасында бір-біріне деген сый-құрметті арттырып, татулық пен бірлікті насихаттау күні.
- 22 наурыз – Жыл басы. Бұл күні еліміздің барлық өңірінде жалпыхалықтық мәдени-спорттық іс-шара ұйымдастырылып, стильді этноауыл мен түрлі жәрмеңке ұйымдастырылады.
- 23 наурыз - Тазару күні. Бұл күні Қазақстанның барлық аймағында жалпыұлттық экологиялық акция өтеді.
Фото: pixabay