Malim.kz
Оқиға

Қабырғаны ашқан сантехник жүздеген конверт тауып алды: олжа жеті жыл бұрынғы ұрлықпен байланысты ма?

• Алуа Әшірбекова
Фото: malim.kz\ ЖИ арқылы өңделген

Жуынатын бөлмені жөндеуге келген сантехник унитаздың артындағы қабырғадан қолма-қол ақша мен чек салынған жүздеген конверт тапқан. Полиция табылған чектерді қарап, олардың жеті жыл бұрын сол ғимаратта болған ұрлыққа қатысы болуы мүмкін екенін мәлімдеді, деп Malim.kz тілшісі The Washington Post басылымына сілтеме жасап хабарлайды.

Оқиға 2021 жылғы 10 қарашада болған. Сантехник кейін жергілікті радиоға қоңырау шалып, унитазды шешіп жатқанда қабырға ішіндегі оқшаулағыш материалды ысырып көргенін айтты. Сол кезде ішінен шамамен 500 конверт құлап түскен. Олардың бірінде қолма-қол ақша, енді бірінде чектер болған.

Ғимарат басшылығы табылған ақша туралы полицияға хабарлаған. Тәртіп сақшылары қабырға ішінен ақша мен чектерден бөлек, ақша аударымына арналған құжаттар да шыққанын мәлімдеді. Олжаның нақты сомасы жарияланбаған.

Жеті жыл бұрын сейфтен не жоғалған?

2014 жылғы наурызда осы ғимараттағы сейфтен жалпы сомасы 600 мың доллар болатын қолма-қол ақша мен чек ұрланған. Араға жеті жыл салып табылған чектерді тексерген полиция олардың сол іске қатысы болуы мүмкін екенін айтты. Қабырғадан шыққан олжаның қанша бөлігі бұрын ұрланған қаражатқа тиесілі екені сол кезде нақтыланбады.

Сантехникке 20 мың доллар берілді

Табылған ақшаны хабарлаған сантехникке жергілікті Crime Stoppers ұйымы 20 мың доллар сыйақы берді. Бұл туралы 2021 жылғы 7 желтоқсанда, олжа туралы хабар көпшілікке тарағаннан кейін белгілі болды.

Оқиға АҚШ-тың Техас штатындағы Хьюстон қаласында, пастор Джоэл Остин басқаратын Lakewood шіркеуінде болған. Конверттерді тапқан сантехник – Джастин Коли (Justin Cauley).

Алуа Әшірбекова
Автордың басқа материалдары