Қазақстанда мемлекетке заңсыз шығарылған активтерді қайтару жалғасып жатыр. Соңғы ресми мәлімет бойынша, елге 1,3 триллион теңге көлемінде актив қайтарылған. Бұл қаражаттың бір бөлігі әлеуметтік нысандар салуға және инфрақұрылымды дамытуға бағытталған, деп хабарлайды Malim.kz.
Бірақ бір маңызды жайт бар: 1,3 триллион теңгенің барлығы бюджетке ақша түрінде түсіп, жұмсалып кетті деу дұрыс емес. Қайтарылған активтердің ішінде ақша да, мүлік те бар. Ақша және сатылған мүліктен түскен қаражат Арнаулы мемлекеттік қорға жинақталады.
1,3 триллион теңге қайтарылды
Қазақстан Бас прокуратурасының соңғы мәліметіне сәйкес, мемлекетке 1,3 триллион теңге көлемінде заңсыз шығарылған актив қайтарылған.
Бас прокурор Берік Асыловтың айтуынша, осы қаражат есебінен 350 әлеуметтік нысанның құрылысы аяқталған.
Оның ішінде:
179 — сумен жабдықтау нысаны;
159 — денсаулық сақтау нысаны;
6 — білім беру нысаны;
3 — спорт нысаны;
2 — инженерлік инфрақұрылым нысаны;
1 — көлік инфрақұрылымы нысаны.
Дереккөз: ҚР Бас прокуратурасы, Бас прокурор Берік Асыловтың прокуратура органдарының ардагерлерімен кездесуінде айтқан мәліметі. 2026 жыл.
Айта кетейік, Үкіметтің мәліметінше, 2024–2026 жылдары Арнаулы мемлекеттік қордан 500-ден астам әлеуметтік маңызды жобаны жүзеге асыруға жалпы 610 млрд теңге бөлінген.
Оның ішінде денсаулық сақтау саласына 170 млрд теңгеден астам қаражатқа 191 жоба қаржыландырылған.
Бұл жерде 610 млрд теңге — қайтарылған активтердің жалпы сомасы емес, Арнаулы мемлекеттік қордан әлеуметтік жобаларға бөлінген қаржы.