"Қазақмыс корпорациясы" ЖШС "Жомарт' кенішіндегі желдету жабдығын жаңартуға 306,9 млн теңге инвестиция салды. Жаңғырту жұмысы жерасты тау-кен қазбасындағы желдету жүйесінің сенімділігін арттыруға және еңбек қауіпсіздігін қамтамасыз етуге бағытталған, деп хабарлайды Malim.kz.
Жоба аясында тоғыз жабдық сатып алынды: Korfmann компаниясының үш желдету қондырғысы және ЖЭЖ сериясындағы алты шахталық желдеткіш, оның ішінде төрт ЖЭЖ-12А және екі ЖЭЖ-8 желдеткіші. 2026 жылдың соңына дейін кенішке тағы үш желдеткіш жеткізу жоспарланған. Жабдықты жеткізу жұмыс берушінің бастамасымен жүзеге асырылуда және кеніштің желдету инфрақұрылымын техникалық жаңарту жөніндегі жоспарлы жұмыстың бір бөлігі болып табылады.
Желдету жүйесі жерасты тау-кен қазбасына таза ауаның берілуі мен таралуын қамтамасыз етеді, сондай-ақ жерасты жұмысын жүргізу кезіндегі өнеркәсіптік қауіпсіздіктің маңызды элементтерінің бірі саналады. Жабдықты жаңарту жекелеген учаскелердегі ауа алмасудың сенімділігін арттырып, ауаның тиісті көрсеткішін тұрақты деңгейде ұстауға мүмкіндік береді.
ЖЭЖ-12А және ЖЭЖ-8 желдеткіштері жерасты қазбасының жекелеген учаскелері мен тұйық қазбасын жергілікті желдетуге арналған. Жабдық жарылыстан қорғалған шахталық үлгіде жасалған. Korfmann желдету қондырғысы ауаның үлкен көлемін айдауға және тау-кен қазбасын тиімді желдетуге жағдай жасайды.
Желдету инфрақұрылымын жаңарту Қазақмыстың "Жомарт" кенішіндегі өндірістік қауіпсіздікті күшейтуге бағытталған өзге де шараларын толықтырды. Атап айтқанда, өздігінен жүретін жерасты тау-кен техникасына стационарлық газ талдағыш – метан-реле орнатылуда. Қазіргі уақытта 56 құрылғы орнатылды, тағы 6 құрылғыға монтаждау жұмысы жүргізілуде. Жұмыс аяқталғаннан кейін 62 бірлік техника метан мөлшерін автоматты түрде бақылау жүйесімен жабдықталады. Сонымен қатар кеніште 130 портативті газ талдағыш қолданылады, ал стационарлық датчиктен алынған дерек бірыңғай диспетчерлік орталыққа беріледі. Аталған жұмыс өндірістік қауіпсіздікті арттыруға бағытталған, 45 іс-шараны қамтитын кешенді бағдарлама аясында жүзеге асырылуда. Бағдарламаға бөлінген қаржының жалпы көлемі 2,7 млрд теңгені құрайды.
Желдету жүйесін жаңғырту кеніштің өндірістік инфрақұрылымын кезең-кезеңімен жаңартудың және өнеркәсіптік қауіпсіздік деңгейін арттыруға бағытталған кешенді шаралардың бір бөлігі болып табылады.
Жұмыс Қазақмыстың 2026-2028 жылдарға арналған өндірістік қауіпсіздікті трансформациялау стратегиясы аясында жүргізілуде. 2026 жыл компанияда Өндірістік қауіпсіздік жылы деп жарияланды.