Malim.kz
Шоу-бизнес

"Қазаққа қызмет ет, Қытайға емес": Желі қолданушысы Димаш Құдайбергенді сынады

• Алуа Әшірбекова
Фото-коллаж: malim.kz\ ЖИ арқылы өңделген

TikTok желісіндегі қолданушы Димаш Құдайбергеннің шетелдегі өнеріне қатысты наразылығын білдірді. Ол әншіге Қазақстанға қызмет ету керектігін айтып, елге өнер адамдарынан гөрі әскерилер қажет деген пікір білдірген, деп хабарлайды Malim.kz.

Malikagulshat89 есімімен тіркелген әйелдің сөзі әлеуметтік желіде тараған бейнежазбада айтылған. Ол Димаштың халықаралық сахнадағы шығармашылығын сынға алып, әншінің Қытайда өнер көрсетуіне көңілі толмайтынын жеткізген.

Желі қолданушысы сөз арасында Мемлекет басшысы Қасым-Жомарт Тоқаевты да атап өткен. Оның пікірінше, әншінің шетелдегі танымалдығынан бұрын өз еліне тигізетін пайдасы маңызды.

"Қазаққа қызмет ет, Қытайға емес. Тоқаевтың қасында жүріп, опера айтып жүрсің. Біздің елде опера айтатын операшы емес, әскерлер керек", – дейді әйел бейнежазбада.

Осылайша, видео авторы өнер иесінің шығармашылығына қатысты жеке көзқарасын ашық білдірген. Әйелдің сыны нақты бір әннің орындалуына немесе концерт бағдарламасына емес, Димаштың шетелдегі қызметіне бағытталған.

Бейнежазбада ол әншінің өнерін елге қызмет ету мәселесімен байланыстырып, мәдениет пен әскердің қажеттілігі туралы пікір айтқан. Алайда келтірілген сөздер – желі қолданушысының жеке ұстанымы.

Айта кетейік, бұған дейін Malim.kz Димаш Құдайбергенді Мексикада жанкүйерлері әуежайдан ерекше қарсы алғанын жазған еді. DIMENSIONS әлемдік концерттік сапары аясында Меридаға барған әншіге тыңдармандары гүлдер мен сыйлықтар табыстаған. Сондай-ақ арнайы келген музыканттар мексикалық композиторлардың шығармаларын орындап, құрмет көрсеткен. Димаш оларды испан тілінде құттықтап, жылы қабылдағандары үшін алғыс айтқан.

Димаш Құдайберген кім?

Димаш Құдайберген – қазақстандық әнші, композитор, бірнеше музыкалық аспапта ойнайтын өнерпаз. Толық аты-жөні – Дінмұхаммед Қанатұлы Құдайберген. Ол 1994 жылғы 24 мамырда Ақтөбе қаласында дүниеге келген. Өнерге жақын отбасында өскен әнші бала кезінен музыкамен айналыса бастаған.

Димаш Ақтөбедегі Ахмет Жұбанов атындағы музыкалық колледжде академиялық ән айту бағыты бойынша білім алған. Кейін Қазақ ұлттық өнер университетінде оқуын жалғастырып, вокал мамандығын меңгерген. Жас кезінен түрлі байқауларға қатысып, "Жас қанат", "Мейкин Азия" секілді конкурстарда жеңіске жеткен.

Әншінің халықаралық деңгейде танылуына Қытайдағы "Singer 2017" жобасы үлкен ықпал етті. Байқауда орындаған "SOS d'un terrien en détresse" әні шетелдік тыңдармандардың назарын аударып, оның шығармашылығына қызығушылықты арттырды. Кейін Димаш АҚШ-тағы "The World’s Best" тележобасына да қатысты.

Өнерпаздың репертуарында эстрадалық және классикалық шығармалармен қатар қазақтың халық әндері де бар. Ол Қазақстанда және шетелде жеке концерттер өткізіп, түрлі тілде ән орындайды. Димаштың тыңдармандары өздерін "Dears" деп атайды. Әнші шығармашылықпен бірге қайырымдылық бастамаларына да қатысып келеді.

Алуа Әшірбекова
Автордың басқа материалдары