Қазақстанда балаларды 1-сыныпқа қабылдаудың жаңа тәртібі бойынша пилоттық жоба іске қосылады. Тиісті бұйрыққа Оқу-ағарту министрлігі мен Жасанды интеллект және цифрлық даму министрлігі қол қойды, деп хабарлайды Malim.kz.
Жаңа ережелер 2026 жылғы 27 мамыр мен 31 тамыз аралығында қолданылады және құжат қабылдау мен балаларды мектепке тіркеу рәсімдерін қамтиды.
Жобадағы негізгі өзгерістердің бірі – мектепалды даярлық тобын (0-сынып) белгілі бір мектепте аяқтаған балаларға қатысты. Егер олар сол білім беру ұйымында оқуын жалғастырғысы келсе, 1-сыныпқа автоматты түрде қабылданады. Бұл үшін ата-анасы немесе заңды өкілі тек өтініш беруі қажет.
Ал баласын басқа мектепке беруді жоспарлаған ата-аналар құжаттарды бұрынғыдай жалпы тәртіп бойынша тапсырады.
Пилоттық жоба аясында қабылдау процесі OQU ұлттық білім беру платформасы арқылы жүзеге асады. Жүйе мемлекеттік деректер базаларымен біріктіріліп, қызмет көрсету рәсімін жеңілдету көзделіп отыр.
Сонымен қатар жүйеге бір уақытта көп өтініш түскен жағдайда «күту бөлмелері» енгізіледі. Мұндай жағдайда пайдаланушылар автоматты түрде электронды кезекке қойылып, өз кезегін бақылап отыра алады.
Сондай-ақ ата-аналар баланы 1-сыныпқа қабылдау туралы оң жауап алғаннан кейін де электронды өтінішін кері қайтарып алу мүмкіндігіне ие болады.
Құжат қабылдау өңірлер бойынша кезең-кезеңімен басталып, 2026 жылдың 31 тамызына дейін жалғасады. Оқу-ағарту министрлігінің мәліметінше, өзгерістердің мақсаты – мектепке қабылдау рәсімін жеңілдетіп, білім беру саласындағы цифрлық қызметтердің тиімділігін арттыру.