Әлеуметтік желілерде Тараз қаласында патрульдік полиция қызметкерлері Сарысу аудандық полиция бөлімінің әкімшілік полиция басқармасының басшысын тоқтатқан сәт түсірілген видео кеңінен тарады, деп хабарлайды Malim.kz.
Желі қолданушыларының мәліметінше, аталған қызметкер көлікті мас күйінде басқарған болуы мүмкін. Видеода әріптестерінің «Көлікті кім жүргізді?» деген сұрағына ер адам «Қарындасым» деп жауап бергені байқалады.
Сондай-ақ әлеуметтік желілерде оқиғадан кейін оның бірден еңбекке уақытша жарамсыздық парағын рәсімдегені туралы ақпарат тарады.
Оқиғаға қатысты Жамбыл облысы полиция департаменті ресми түсініктеме берді. Ведомство мәліметінше, қазіргі уақытта қызметтік тергеу жүргізіліп жатыр.
«Аталған құқық бұзушылықты жасаған тұлға теріс себептер бойынша ішкі істер органдарынан жұмыстан шығарылады. Полиция департаменті заң мен қызметтік тәртіптің кез келген бұзылуына қатысты қатаң әрі принципті ұстанымда. Кінәлі тұлғалар лауазымына, шеніне және қызметтік жағдайына қарамастан жауапкершіліктен жалтара алмайды», – деп хабарлады облыстық полиция департаментінің баспасөз қызметі.
Құқық қорғау органдары қызметтік тексеру аяқталғаннан кейін қосымша ақпарат берілетінін мәлімдеді.
Айта кетейік, бұған дейін Астанада мас күйінде көлік жүргізді деген күдікпен судьяның ұсталғаны туралы ақпарат тараған болатын.