Сара Назарбаева Президент Іс басқармасы Медициналық орталығының Ұлттық госпиталынан (бұрынғы атауы – Совминка) шығарылды, деп хабарлайды Malim.kz.Tengrinews.kz сайтына сілтеп. Медициналық мекемеде науқастың емдеу курсын аяқтап, 2026 жылдың қаңтар айында дәрігерлердің амбулаторлық бақылауына жіберілгені айтылды.
«Денсаулық жағдайы, диагнозы, емдеу әдістері мен нәтижелері туралы өзге ақпарат Қазақстан Республикасының “Халық денсаулығы және денсаулық сақтау жүйесі туралы” Кодексінің 273-бабына сәйкес дәрігерлік құпияға жатады және жария етілмейді», – деп қосты емхана өкілдері.
Еске салайық, Сара Назарбаеваның ауруханаға жатқызылғаны туралы ақпарат 2025 жылдың 5 мамырында пайда болды. Ол кезде оның жағдайы ауыр екені хабарланған. Госпитализациядан бірнеше күн өткен соң әлеуметтік желілерде Сара Назарбаеваның кенеттен қайтыс болғаны туралы ақпарат тарады. Алайда ресми дереккөздер бұл мәліметті жоққа шығарып, жалған ақпарат екенін мәлімдеді.
2025 жылдың қазан айында Қазақстанның тұңғыш президентінің кеңесшісі – баспасөз хатшысы Айдос Үкібай Сара Назарбаеваның сәуір айынан бері Ұлттық госпитальда ем қабылдап жатқанын хабарлаған болатын. Осылайша, елдің бірінші ханымы дәрігерлердің бақылауында шамамен 9 ай болды.
Сара Назарбаеваның өмірбаяны
Сара Назарбаева 1941 жылғы 12 ақпанда Қарағанды облысында дүниеге келген. Ол 1962 жылы Нұрсұлтан Назарбаевқа тұрмысқа шықты. Бір жылдан кейін жас отбасында тұңғыш қыздары – Дариға дүниеге келді. Кейінірек Динара мен Әлия Назарбаевалар өмірге келді.
Қыздары өсіп-жетілгенге дейін Сара Назарбаева көпшілік алдында сирек көрінді. Балалары есейіп, өз алдына өмір сүре бастаған соң, ол қоғамдық қызметке белсене араласты. 1992 жылдың ақпан айынан бастап «Бөбек» халықаралық балалар қайырымдылық қорының негізін қалаушы әрі президенті болды.
1994 жылдың жазында «SOS – Қазақстанның балалар ауылдары» қорының президенті атанды. 1999 жылы «Демография» қайырымдылық қорының қамқоршылық кеңесін басқарды.
Қайырымдылық пен мейірімділік саласындағы елеулі еңбегі үшін Сара Назарбаева халықаралық ұйымдардың көптеген марапаттарына ие болды. Олардың қатарында Дүниежүзілік денсаулық сақтау ұйымының Ихсан Дограмаджи атындағы халықаралық сыйлығы, Unity халықаралық сыйлығы, «Құрманжан Датка» сыйлығы бар. Ол өзін-өзі тану философиясына қосқан зор үлесі үшін Шыңғыс Айтматов атындағы алтын медальмен марапатталған. Сондай-ақ Сара Назарбаева Ресей Қызыл Кресті тағайындаған, жас ұрпақты қолдауға бағытталған көпжылдық қызметі үшін берілетін «Алтын жүрек» халықаралық сыйлығын Софи Лореннің қолынан алған.