Шкаф толып тұрса да, киетін киімді таба алмай қалатын кездер болады. Кейде мәселе киімнің көптігінде емес, қалай жиналғанында. IKEA ұсынған кеңестерге сүйеніп, шағын шкафты реттеудің оңай жолдарын ұсынамыз, деп хабарлайды Malim.kz.
1. Киімді үсті-үстіне үймей, тік орналастырыңыз
Футболка мен жұқа үй киімдерін шағын төртбұрыш етіп бүктеп, тартпаға қатарынан тік қойыңыз. Сонда әрқайсысы көрініп тұрады. Керегін алғанда қалған киімді қайта жинаудың қажеті болмайды.
2. Маусымы өткен киімді бөлек жинаңыз
Қыста кимейтін жазғы киімдерді күнделікті киіммен араластырмаңыз. Жуып, әбден кептірген соң қорапқа салып, жоғарғы сөреге қойыңыз. Қораптың сыртына ішінде не барын жазып қойсаңыз, кейін іздеу оңай болады.
3. Ұсақ заттарға жеке орын бөліңіз
Шұлық, белдік пен ішкиімді бір тартпаға араластырып тастамаңыз. Оларды шағын қораптармен немесе бөлгіштермен бөліп орналастырыңыз. Әр заттың орны белгілі болса, тартпаны реттеп ұстау да жеңілдейді.
4. Ілулі киімнің астындағы орынды пайдаланыңыз
Қысқа күрте мен жейденің астында бос орын қалса, оған қорап қоюға болады. Ал сирек қолданылатын заттарды жоғарғы сөреге орналастырыңыз. Күнде киетін киім қол жететін жерде тұрсын.
5. Шкафты сықап толтырмаңыз
Ілгіштердің арасында аздап орын қалдырыңыз. Тығыз тұрған киімді көру де, алу да қиын. Киімдерді түріне қарай топтастырып, көптен бері кимегендеріңізді бөлек қарап шығыңыз. Жарамдысын жақындарыңызға ұсынуға немесе қайырымдылыққа беруге болады.