Бүгін премьер-министрдің орынбасары Ералы Тоғжановтың төрағалығымен ел аумағында коронавирустық инфекцияның таралуына жол бермеу жөніндегі ведомствоаралық комиссияның отырысы өтті. Онда Денсаулық сақтау министрі Алексей Цой елдегі санитариялық-эпидемиологиялық жағдай туралы баяндама жасапты. Оның мәліметінше, соңғы екі аптада COVID-19 ауру көрсеткіші - 60%, өлім деңгейі - 80% төмендеген. Инфекциялық төсек-орын жүктемесі деңгейінің 56%-дан 33% дейін, реанимациялық төсектердің - 45%-дан 32% дейін азайған.
Комиссия отырысы барысында ел өңірлеріндегі коронавирустық инфекцияның жағдайы және азаматтарды вакцинациялау деңгейі туралы баяндамалар тыңдалды. Премьер-Министрдің орынбасары өңірлерге иммундау қарқынын босаңсытпауды тапсырды. Сонымен қатар ВАК келушілердің мәртебесін тексермейтін Ashyq жүйесінің 12 мың жосықсыз қатысушысын 2 аптаға жүйеден алып тастау туралы шешім қабылдады. Ведомствоаралық комиссияның отырысын қорытындылай келе Ералы Тоғжанов бірқатар нақты тапсырмалар беріп, ВАК қатысушыларының алдында таяу уақыттағы басым міндеттерді белгілепті.