Жуынған соң сүртінсеңіз де, денеңіз дымқыл күйінде қала ма? Сүлгінің су сіңірмей қалуына оны жуу тәсілі де әсер етеді. Malim.kz Whirlpool компаниясының кеңестеріне сүйеніп, сүлгі күтіміндегі қарапайым амалдарды ұсынады.
Жұмсартқышты қоспай жуып көріңіз
Сүлгі үлпілдеп, хош иісті болсын деп кір жұмсартқыш қосамыз. Алайда ол талшықтың бетінде жұқа қабат қалдырып, судың сіңуін нашарлатуы мүмкін. Сондықтан сүлгі су сіңірмей жүрсе, келесі жолы жұмсартқышсыз жуып көріңіз.
Ұнтақты мөлшерінен асырмаңыз
"Көбірек салсам, жақсырақ тазаланады" деген түсінік бұл жерде көмектеспейді. Артық жуғыш зат матада қалып, сүлгіні қатайтуы мүмкін. Қаптамадағы мөлшерді ұстанып, жуылатын заттың көлемін ескеріңіз.
Машинаны сықап толтырмаңыз
Сүлгілер барабанда еркін айналатындай орын қалсын. Оларды нығыздап салсаңыз, дұрыс жуылып, шайылуы қиындайды. Ақ сүлгіні түрлі түсті сүлгіден бөлек жуған жөн.
Температураны заттаңбасына қарап таңдаңыз
Барлық сүлгіні бірдей ыстық сумен жууға болмайды. Матасы мен жиегіндегі әшекейіне қарай күтімі өзгереді. Сондықтан алдымен заттаңбасындағы жуу және кептіру белгілерін қараңыз.
Дымқыл күйінде бүктемеңіз
Жуылған сүлгіні машинада қалдырмай, бірден алып, сілкіп жайыңыз. Әбден кепкен соң ғана бүктеп, орнына салыңыз. Шала кепкен сүлгіден дымқыл иіс шығуы мүмкін.
Сүлгінің күтімін түзету үшін қымбат қоспа іздеудің қажеті жоқ. Алдымен жұмсартқышты қоспай, жуғыш затты мөлшерімен қолданып көріңіз.