Халықаралық тестілеу агенттігі (ITA) әлем және Азия чемпионаттарының күміс жүлдегері Дулат Бекбауовқа қатысты тәртіптік шешім қабылдады, деп хабарлайды Malim.kz Tengri Sport-қа сілтеме жасап.
ITA мәліметінше, спортшы 12 ай ішінде үш рет орналасқан жері туралы мәліметті уақытында тіркемеген. Мұндай тәртіп бұзу антидопинг ережелерінің 2.4-бабына сәйкес келеді.
Ұйымның хабарлауынша, Бекбауов аталған фактілерді дауламаған. Нәтижесінде оған қатаң санкция салынды.
"Дулат Бекбауовқа 2025 жылдың 18 қарашасынан 2027 жылдың 17 қарашасына дейін екі жылға дисквалификация тағайындалды. Сондай-ақ 2025 жылдың 1 қаңтарынан бергі барлық спорттық нәтижелері жойылады," – делінген ITA хабарламасында.
Айта кетейік, Бекбауов – 2023 жылғы әлем чемпионатының және 2024 жылғы Азия чемпионатының күміс жүлдегері. 2024 жылғы құрлықтық біріншіліктің медаль табыстау рәсімінде ол төрешілер шешіміне қарсылық ретінде подиумға шығудан бас тартқан еді.