Қазақстан Президенті Қасым-Жомарт Тоқаев Теміртауға сапары кезінде Республика даңғылымен "Инженерная" аялдамасына дейін трамваймен барды. Қайта іске қосылған көлік жүйесінің жұмысымен танысқан Мемлекет басшысы металлургтер қаласының ұзақ уақыт бойы күтімсіз қалғанын, қазір жағдай біртіндеп жақсарып келе жатқанын атап өтті, деп хабарлайды Malim.kz.
Сапар барысында Президент атқарылған жұмыстың сапасын және жаңартылған трамвай желісінің жолаушыларға толыққанды қызмет көрсетуге дайындығын бағалады.
Ақорданың мәліметінше, Теміртаудағы трамвай қатынасын Qarmet компаниясы 2024 жылы қалпына келтірген. Қатынас қайта жанданғаннан бері жолаушылар трамваймен миллионнан астам рет сапарлаған.
Қалада барлығы 30 шақырым трамвай жолы жөнделіп, тозған бөліктері ауыстырылды. Сондай-ақ заманауи сегіз жаңа вагон сатып алынды.
Трамвайларда жолақыны электронды түрде төлеуге болады. Ал Qarmet кәсіпорнының қызметкерлері мен ардагерлері тегін жүреді.
"Теміртау үшін трамвай – дәуірлер сабақтастығының белгісі"
Qarmet басшылығымен әңгімелескен Қасым-Жомарт Тоқаев трамвай қатынасының қалпына келуі қала үшін айрықша маңызды екенін айтты.
"Шынында да, Теміртау үшін трамвай – дәуірлер сабақтастығының белгісі. Тұрғындардың трамвай қатынасын қалпына келтіруді талап еткені де, сіздердің олардың өтінішіне құлақ асқандарыңыз да дұрыс болды", – деді Президент.
Мемлекет басшысы бұған дейін металлургия кәсіпорнының басшылығына Теміртауды абаттандыруға көңіл бөлуді тапсырғанын еске салды.
Тоқаевтың айтуынша, қалада көптен қордаланған мәселелерді шешіп, ауқымды өзгерістер жасау қажет болған.
"Қала күтімсіз қалған еді"
Президент Теміртаудың жағдайына және қала инфрақұрылымын жаңарту жұмыстарына да тоқталды.
"Комбинатқа келген кездеріңізде Теміртауды абаттандырумен міндетті түрде айналысу керектігін айтқанмын. Қала күтімсіз қалған еді. Мұнда әлі де атқаратын жұмыс көп, дегенмен алғашқы қадам жасалды", – деді Қасым-Жомарт Тоқаев.
Ол қаланы газдандыру жұмыстарына да назар аударды. Президенттің айтуынша, тұрғындар оң өзгерістерді байқап отыр.
"Теміртау тұрғындары газбен қамтылды. Білуімше, халықтың көңіл күйі жақсы. Өйткені жұрт оң өзгерістерді көріп, алғысын білдіріп жатыр. Менің түсінуімше, еңбек ұжымының да көңіл күйі айтарлықтай жақсарған", – деді Президент.
Тоқаев металлургия кәсіпорнының алдағы дамуына сенім білдірді.
"Ең бастысы – оң өзгерістер бар. Біз комбинатты міндетті түрде ілгерілеудің, табыстың, тіпті өркендеудің символына айналдырамыз", – деп атап өтті Мемлекет басшысы.
Трамвай қатынасы неліктен тоқтаған еді?
Еске салайық, Теміртауда трамвай қозғалысы 2023 жылғы ақпанда тоқтатылған болатын.
Оны қайта іске қосу металлургия комбинатының жаңа иесі – Qarmet компаниясы қолға алған бастамалардың бірі болды.
2024 жылы кәсіпорын трамвай жолдарын, электрмен жабдықтайтын әуе желілерін және өзге де қажетті инфрақұрылымды жаңартуға кірісті. Сол жылдың күзінде жаңа вагондар сынақтан өткізіле бастады.
Жаңа трамвайларда жылыту және ауа баптау жүйелері, заманауи жарықтандыру құралдары мен жолаушылар қауіпсіздігін қамтамасыз ететін жабдықтар бар. Едені аласа вагондар мен жиналмалы пандустар жүріп-тұруы қиын азаматтардың мініп-түсуіне қолайлы жағдай жасайды.
Қазір Ақорданың дерегінше, қалпына келтірілген желіде сегіз жаңа вагон қатынап жүр. Трамвай қозғалысы қайта жанданғаннан бері жолаушылар сапарының жалпы саны миллионнан асқан.