Бөлмені желдету, қолды таза ұстау және ауырған кезде үйде қалу тұмаудың таралуын азайтуға көмектеседі. Ал аурудан қорғанудың негізгі тәсілі – жыл сайын вакцина алу. Malim.kz тілшісі Дүниежүзілік денсаулық сақтау ұйымының ұсынымдарына сүйеніп, тұмаудың алдын алу жолдарын жинақтады.
Тұмауға қарсы екпені жыл сайын алған жөн. ДДСҰ мәліметінше, вакцина аурудың ауыр өтуі мен асқыну қаупін азайтады. Екпе әсіресе жүкті әйелдерге, алты айдан бес жасқа дейінгі балаларға, егде жастағы адамдарға, созылмалы ауруы бар жандарға және медицина қызметкерлеріне маңызды.
Екпені тұмау маусымы басталғанға дейін алған дұрыс, бірақ маусым кезінде де салдырудың пайдасы бар. Ағзада қорғаныс қалыптасуына шамамен екі апта қажет. Вакцина алу мүмкіндігін өз емханаңыздан нақтылауға болады.
Күнделікті сақтықтың бірі – бөлмеге таза ауа кіргізу. Терезені жүйелі ашып, үй мен жұмыс орнын желдетіңіз. Адам көп жиналатын, ауасы нашар алмасатын жабық орындарда болуды азайтып, ауырған адаммен жақын араласудан сақтанған жөн. Тұмау вирусы науқас сөйлегенде, жөтелгенде немесе түшкіргенде ауаға тарайды.
Қолды сабынмен жуып, мұқият құрғатыңыз. Жуылмаған қолмен көзді, мұрынды және ауызды ұстамауға тырысыңыз. Жөтелгенде не түшкіргенде ауыз бен мұрынды бірреттік майлықпен жауып, оны бірден қоқысқа тастаңыз. Жиі ұстайтын беттерді де тазалап тұрған дұрыс.
Тұмауға ұқсас белгілер байқалса, жұмысқа не сабаққа бармай, үйде қалған жөн. Басқалармен араласуға тура келсе, маска тағыңыз. Жағдайыңыз нашарласа немесе қауіп тобына жатсаңыз, дәрігерге ертерек хабарласыңыз. Антибиотикті өз бетіңізше қабылдамаңыз: ол тұмау вирусына әсер етпейді.