Қазақстанның Денсаулық сақтау министрлігі «Ашық НҚА» порталында кешкі және түнгі уақытта жедел жәрдем шақыру тарифін көтеруді ұсынатын жобаны жариялады, деп хабарлайды Malim.kz Azattyq Rýhy-на сілтеме жасап.
Жобаның қысқаша мазмұнында көрсетілгендей, ұйымдардың жұмыс уақытынан тыс IV шұғыл санатындағы жедел жәрдем шақыру шығындарын өтеу мөлшерін бір тіркелген адамға 340 теңгеден 360 теңгеге дейін арттыру көзделіп отыр.
«Бұл жедел жәрдем қызметтерінің ресурстарын күшейтіп, азаматтардың өтініштеріне жедел әрекет етуге мүмкіндік береді», – деп түсіндірді бастаманы Денсаулық сақтау министрлігі.
Министрлік өкілдерінің пікірінше, тарифті қайта қарау емханаларға жұмыс істемейтін кешкі және түнгі уақытта жедел жәрдем шақыруларын дер кезінде орындауға жағдай жасайды.
«Өзгерістер шақыртуларға әрекет ету жеделдігін арттыруға, пациенттерге көрсетілетін көмектің сапасын жақсартуға және жедел жәрдем бригадаларына түсетін өсіп жатқан жүктемені азайтуға бағытталған. Тарифтің көтерілуі жедел жәрдем жұмысының тиімділігін арттырып, медициналық көмектің әрбір Қазақстан азаматы үшін қолжетімді және уақытылы болуына ықпал етеді», – делінген жобада.
Айта кетейік, жоба бүгін жарияланып, 15 желтоқсанға дейін талқылау үшін қолжетімді болады. Алайда жобаға пікір қалдырған қазақстандықтар қазірдің өзінде наразылығын білдірген.