Үш жүз спартактан асып түскен бір қазаққа Путин неге батыр атағын бермейді?

300 СПАРТАК қажет емес,  1 Қазақ жетеді!

Тасболат

2008 жылы Грузия мен Оңтүстік Осетия қақтығыстарының бірінде – батыс басылымдары жарыса жазған оқиға болды. Оңтүстік Осетияға, басқыншы ретінде келген Ресей әскері екі қаланы жалғап тұрған үлкен тас жолдың қақ ортасына үш сарбазын күзетке қойып, өздері қаланың ішінде шеп құруға шегініп кетеді. Ешкімді қалаға өткізбеуге бұйрық етіледі. Жол күзетіп қалған  үшудің бірі – Астрахан қаласының тумасы, ұлты қазақ – Тасболат Ибрашев болатын. Тасболаттың Оңтүстік Осетиядағы орыс әскеріне келіп қосылғанына бір-ақ күн болған екен. Өзі пулеметші.

Алайда, көп уақыт өтпей-ақ жаңағы жолмен қаз-қатар жөңкіліп – танкісі, БТР-і бар, үш жүз – төрт жүз сарбазымен грузин әскері көшіп келе жатады. Бұйрық бойынша бұларды қалайда тоқтату қажет. Не, жол шетіндегі бұта-бұтаның арасында өтіп кеткенше тығыла тұру керек. Ал, тоқтатам деп жолға шығу өліммен тең еді. Алайда, қасындағы екі жігітті жол шетіне қалдырып, Тасболат – тас жолдың ортасына пулеметін көтеріп атып шығады. Әскери көш оған елу метр жетпей тоқтайды. Олар «жолдан кет!» дейді, бұл «өткізбеймін, кері қайтыңдар!» дейді. Бір сағатқа жуық керілдесіп тұрған кейін Тасболат жерге жатып, пулеметпен оқ жаудыруға бекінеді. Осы кезде ғана грузин әскери көші кері бұрылады. Грузиндермен бірге батыс журналистері бірге жүрген екен, осы көріністің бәрін олар таспаға түсіріп алады. Ертесі батыс басылымдары – қасқыр жүректі қара жігіттің ерлігін жабыла жазды. Олар «Жеңіс үшін 300 Спартак қажет емес, біреу жетеді» деген сөзді мәтелге айналдырды. Осыдан кейін орыс әскерінің басшылары Тасболаттың ерлігін қызғанды ма белгісіз, сол оқиғадан екі-үш күннен соң қайтыс болып кеткен пулеметші бурят жігіті  Бато Дашидоржиевтың атына жазып жібереді. Тасболат біраз уақыттан соң өз әлеуметтік желідегі парақшасына «Бұл мен едім» деп суреттерін салғанымен, оған ешкім назар аудармайды. Өзі де артынан қудалап дәлелдеуге тырыспайды.

Он жылдай уақыт өтіп кеткеннен кейін ғана Буратия Республикасының өкілі Ресей думасының депутаты Алдар Дамдинов – 2008 жылы Грузиядағы соғысқа қатысқан ардагерлермен кездесіп, батыс ақпарат құралдарын шулатқан сарбазға іздеу салады.  Бірақ, өзінің жерлесі Бато туралы бір де-бір ақпарат таба алмайды. Ондай адам болған-болмағаны да белгісіз болып шығады. Ақыр аяғы ол жігіт – Тасболат Ибрашев екені анықталады.  Көптеген тексерулердің соңында әділдік жеңіске жетті.

Алдар Дамдинов – өзінің Facebook парақшасына «Таныс болыңыздар, бұл батыр грузин әскери көшін жалғыз өзі тоқтатқан жаужүрек – Тасболат Ибрашев! Астрахан қаласының тумасы, ұлты қазақ, екі баланың әкесі. И ещё, имя Тасболат с казахского означает - "каменный меч»» деп жазып, орыс жұршылығымен таныстырды.  Алдар Дамдинов Тасболатқа батыр атағын беру туралы РФ-ның Қорғаныс Миністірлігіне ұсыныс хат дайындап қойған екен, ол енді беріле ме, берілмей ме, бір Алла біледі.

Егер дейді бір ойымыз, батыс басылымдарын таңқалдырған жүрекжұтқан Тасболаттың орынында Иван болса, Путин оған әлдеқашан батыр атағын беріп қояр еді...

Дайындаған Айбек Ережепов