Ресейдегі логистикалық инфрақұрылымға жасалған дрон шабуылдарынан кейін Wildberries компаниясы Қазақстан аумағынан шамамен 100 мың шаршы метр қойма жалдау мүмкіндігін қарастырып жатыр. Бұл туралы Reuters агенттігі мен бірқатар ресейлік БАҚ хабарлады. Компания жеткізу тізбегінің тұрақтылығын қамтамасыз ету үшін логистикалық мүмкіндіктерін әртараптандыруға ниетті.
Ақпаратқа сәйкес, Wildberries Алматыда көлемі 100 мың шаршы метрден асатын, ал Астанада 160 мың шаршы метрден асатын логистикалық орталықтар салу жобаларын да жалғастырып жатыр. Алайда сарапшылар Қазақстанда мұндай көлемдегі заманауи қойма алаңдарының тапшылығы байқалатынын, сондықтан қажетті нысандарды табу оңай болмайтынын айтады.
Соңғы күндері Украина дрондарының шабуылынан Ресейдегі Wildberries-тің бірнеше қоймасы зақымданып, компанияның логистикалық қуатының шамамен 10 пайызы уақытша істен шыққаны хабарланды. Осы жағдайдан кейін компания жеткізу бағыттарын қайта қарап, көрші мемлекеттердегі инфрақұрылымды пайдалану мүмкіндігін зерделеп жатыр.