Желіде Қазақстанның Жетісу облысында қоқыс алаңынан елтаңба тауып алған блогерге айыппұл салынғаны туралы ақпарат тарады. Оқиғаға өңірлік полиция түсініктеме берді, деп хабарлайды Malim.kz.
Мәліметке сәйкес, Жетісу облысы Жансүгіров ауылының тұрғыны, блогер Данияр Бейісқали шамамен төрт жыл бұрын қоқыс арасынан Қазақстанның мемлекеттік елтаңбасын тауып алған. Ер адам нышанды тазалап, ретке келтіріп, кейін оны өз үйіне іліп қойған.
Алайда бұл әрекет көпшіліктің қолдауына ие бола бермеген. Бірнеше жыл өткен соң жағдай жергілікті билікке белгілі болып, нәтижесінде блогерге 216 мың теңге көлемінде айыппұл салынған.
«Ниеті дұрыс сияқты көрінгенімен, бұл әрекет бәріне бірдей ұнай қоймаған. Арада бірнеше жыл өткен соң бұл ақпарат жергілікті билікке жетіп, блогерге 216 мың теңге айыппұл салынды», – делінген хабарламада.
Жетісу облыстық Полиция департаментінің мәліметінше, Ақсу ауданы әкімдігінен Қазақстан Республикасының мемлекеттік елтаңбасын мақсатсыз пайдалану дерегі бойынша арыз түскен.
«Тексеру барысында аталған құқықбұзушылыққа жол берген Ақсу ауданының тұрғыны анықталды. Ол Қазақстан Республикасының қолданыстағы заңнамасына сәйкес жауапкершілікке тартылды», – деп мәлімдеді ведомствоның баспасөз қызметі.
Полиция өкілдері мемлекеттік рәміздер заңмен ерекше қорғалатынын еске салды. Оларды тек белгіленген тәртіппен пайдалану қажет.
«Мемлекеттік рәміздерге құрметпен қарап, оларды заңсыз пайдалануға жол бермеулеріңізді сұраймыз», – деді Жетісу облыстық Полиция департаменті.