Киімді жуып болғаннан кейін де одан дымқыл немесе көгерген иіс сезілсе, кір жуғыш машинаның тазалығына назар аударған жөн. Барабанда, есіктің резеңке тығыздағышында және ұнтақ салатын бөлікте жиналған қалдықтар жағымсыз иістің пайда болуына себеп болуы мүмкін, деп хабарлайды Malim.kz.
Кір жуғыш машина киімді тазартқанымен, оның ішінде де жуғыш зат пен кірдің қалдықтары жиналады. Ылғал мен жылу көгеруге және иіс тудыратын микроорганизмдердің көбеюіне қолайлы жағдай жасайды. Сондықтан құрылғыны күтіп ұстау кезінде тек барабанды тазалаумен шектелмеу керек.
Ұнтақты көп салу киімді таза ете ме?
Жуғыш затты мөлшерден артық қосу киімнің жақсы жуылатынын білдірмейді. Керісінше, оның қалдықтары машинаның ішінде жиналуы мүмкін. Samsung ұнтақты қаптамада көрсетілген мөлшерде қолдануды ұсынады. Сондай-ақ автоматты кір жуғыш машинаға арналмаған заттарды қоспау керек: олар құрылғының ішкі бөлшектерінде қақтың пайда болуына ықпал етеді.
Ұнтақ салатын бөлікті де жуу қажет
Жуғыш зат салатын науада ұнтақ пен жұмсартқыштың қалдықтары қалып қояды. Samsung мәліметінше, бұл жағымсыз иіске және су ағуына себеп болуы мүмкін.
Науаны тазалар алдында машинаны электр желісінен ажырату қажет. Оны құрылғының нұсқаулығына сәйкес шығарып, алынбалы бөлшектерін ағын сумен жууға болады. Қатып қалған қалдықтарды жұмсақ щеткамен тазалаған жөн. Бөлшектерді орнына салғаннан кейін қалған жуғыш затты кетіру үшін киімсіз "Шаю және сығу" режимін қосуға болады. Науаның құрылысы әр модельде әртүрлі болғандықтан, оны күшпен тартпау керек.
Есіктің резеңкесін ұмытпаңыз
Есіктің айналасындағы резеңкенің қатпарларына ылғал мен кір жиналады. Сол себепті оны жүйелі түрде тазалап, жуғаннан кейін қалған суды сүртіп тұрған дұрыс. Барабанды тазалау үшін құрылғыда қарастырылған арнайы режимді және өндіруші ұсынған тазартқышты қолданған жөн. Құралдың мөлшері мен қолдану тәсілі оның нұсқаулығына сай болуы керек.
Иістің алдын алуға көмектесетін қарапайым әдеттің бірі – жуылған киімді барабанда ұзақ қалдырмай, бірден алып жаю. Жуу аяқталған соң машинаның есігін ішіндегі ылғал кепкенше ашық қалдыру да пайдалы. LG барабанды тазалау режимін айына бір рет іске қосуды ұсынады, ал нақты күтім тәртібін өз құрылғыңыздың нұсқаулығынан тексеруге болады.