АҚШ-тың Балтимор қаласында Фрэнсис Скотт-Ки көпіріне жүк кемесі соғылды. Салдарынан ұзындығы 2,5 шақырымдық көпір қирап қалды. BBC мәліметінше, алты адам із-түзсіз жоғалып кеткен.
Жергілікті биліктің мәліметінше, оқыс оқиғадан бірнеше көлік, оның ішінде тіркемесі бар жүк көлігі Патапско өзеніндегі көпірден құлаған.
АҚШ-тың Федералды киберқауіпсіздік және инфрақұрылымдық қауіпсіздік агенттігінің (CISA) мәліметінше, «Dali» кемесі көпір тірегіне соғысқанға дейін «қозғалыс бағытын жоғалтқан».
Апат салдарынан алты адам із-түзсіз жоғалып кетті. Сейсенбі күні кешке АҚШ жағалау күзеті су мен ауа температурасын ескере отырып, оларды қайтыс болуы мүмкін екенін және іздеу операциясы тоқтатылғанын хабарлады.
Судан екі адам шығарылған. Біреуі медициналық көмектен бас тартқан, ал екіншісі ауыр халде ауруханаға жеткізілген.
Олардың бәрі - сол түні көпірде жол жөндеп жатқан жұмысшылар. Мэриленд штатының губернаторының айтуынша, кеме соқтығыспас бұрын белгі берген, ал жұмысшылар апат алдында көлік қозғалысын жауып үлгерген. Билік оларды батырға теңеп отыр.
Айта кетейік, Сингапур туымен жүзіп келе жатқан контейнерлік жүк тасымалдайтын 300 метрлік «Dali» кемесі көпірге соғылған. Кеме Балтимор портынан Коломбоға (Шри-Ланка) бағыт алған.
Сондай-ақ, оқыңыз: Қайрат Боранбаев мемлекетке өткізген қонақ үйдің аукционы өтпей қалды
ФОТО: Reuters
