Тасмағамбетовтің миллиардер күйеу баласы Мәскеудегі сарайын сатпақ
Белгілі саясаткер Иманғали Тасмағамбетовтің күйеу баласы Кеңес Рақышев Мәскеу маңындағы аумағы 841 шаршы метр үйін сатуға қойыпты.
Бұл ақпаратты ең алдымен «Выход к морю» телеграм арнасы таратты. Осыдан кейін ресейлік жылжымайтын мүлік агенттігі шығарған хабарлама ашылмай қалған. Азаттық сайты ақпараттың ізіне түсіп, жылжымайтын мүлік агенттігіне хабарласыпты.
– Хабарлама сайттан мүлік иесінің өтінішімен алынып тасталды. Бірақ үйді сату шешімі әлі өзекті, - депті өзін Михаил Бурыкин деп таныстырған NF Group жылжымайтын мүлік агенттігінің қызметкері. Оның айтуынша, үйдің құнына ішіндегі жиһаз бен техника бағасы да кіреді.
69 сотық жерде орналасқан екі қабатты коттедждің бастапқы бағасы 850 миллион рубль болған, қазір 670 миллион рубльге (шамамен 4 млрд теңге) түскен.
Үй Мәскеудегі ең қымбат ауданда – Рублево-Успенское күре жолында орналасқан. Жылжымайтын мүлік агенттігінің хабарламасы бойынша, онда үш жатын бөлме, бірнеше зал, аумағы 234 шаршы метр монша, 3 автокөлік сыятын гараж бен қызметкерге арналған бір бөлмелі үй бар.
Агенттік өкілі үй иесінің қазір Ресейде тұрмайтынын, сол үшін сатқысы келетінін айтқан.
(Басты беттегі фотода Кеңес Рақышев пен жұбайы Әсел Тасмағамбетова. Фото авторы: Harper’s BAZAAR Kazakhstan. Мария Попова)
Байланысты жаналықтар
MalimBlocks
