Тасмағамбетовтің күйеу баласы АҚШ президентіне пара берген
АҚШ президентінің ТМД елдерінің шенеуніктер мен кәсіпкерлерінен пара алғаны белгілі болды.
Фотода: Қазақстандық кәсіпкер Кеңес Рақышев пен сол кездегі ҰҚК басшысы Кәрім Мәсімов Байдендермен
АҚШ Өкілдер палатасының қадағалау комитетінің төрағасы Джеймс Комер жариялаған 19 беттік құжатта президент Джо Байденнің ұлы Хантер Байден әкесінің вице-президент кезінде (Барак Обама президент) беделін пайдаланып пара алғанын айтады. Байдендердің сол жылдары банк шоттарында Қазақстан, Қытай, Румыния, Ресей және Украина тағы басқа шетелдіктерден миллиондаған доллар түскенін анықтап отыр. Құжатта банк жазбаларының скриншоттары көрсетілген. Байден отбасы мен олардың серіктестері айырбас ретінде қандай қызмет көрсеткенін түсіндірмеді. 20 млн доллардан астам шетелдік аударымдар түсті делінген құжатта қазақстандық олигарх Кеңес Рақышевтың аударымдары туралы да айтылған. ҰҚШҰ бас хатшысы Иманғали Тасмағамбетовтың күйеубаласы Хантермен оның серіктесі Девон Арчердің Rosemont Seneca Bohai компаниясының шотына 142 мың 300 доллар аударған. Рақышев ол ақшаны өзінің Сингапурда тіркелген Novatus Holdings компаниясы арқылы жүзеге асырған. Келесі күні дәл сол сома Rosemont Seneca Bohai шотынан Хантер Байденге арналған спорттық автокөлік үшін Нью-Джерсидегі автосалонға аударылған. 2014 жылдың көктемінде Хантер Байденнің спорттық көлігіне төлем жасалған уақытта вице-президент Джо Байден Вашингтондағы Milano кафесінде Кеңес Рақышев, Кәрім Мәсімов және басқа да қонақтар кешкі ас ішкен көрінеді. Сол аста ресейлік кәсіпкер Мәскеудің бұрынғы мэрінің әйелі Елена Батурина да болған. Кейінен ол да аталған компанияға 3,5 миллион доллар аударды деген болжам бар.
2014 жылдың мамыр-маусым айларында Хантер Байден және оның серіктесі Девон Арчер Қытайдың мемлекеттік энергетикалық компаниясы, «Burisma» және «ҚазМұнайГаз» арасындағы үш жақты келісімді бағалау үшін Қазақстанға іс-сапармен Украинаның Burisma энергетикалық компаниясының атынан келген. Құжат авторлары бұл туралы Хантердің сол кездегі Burisma басшысының кеңесшісі Вадим Пожарскиймен электрондық хат алмасуына сілтеме жасап хабарлап отыр.
Әрине Ақ үй мұндай мәлімдемелерді жоққа шығарды және Джо Байден ұлының бизнесіне ешқандай қатысы жоқ екен айтты.
