Ресейдегі «Крокус сити холл» концерт залында болған лаңкестікке қатысы бар сегізінші күдікті ұсталды. Күдікке ілінген Қырғызстан тумасы Әлішер Қасымов лаңкестердің жоспарынан бейхабар болғанын айтып отыр. Тергеу мәліметтеріне қарағанда, ол бұған дейін ұсталған күдіктілерге пәтерді жалға берген. Қасымовтың сөзінше, ол «Авито» қосымшасының қызметі арқылы ғана олармен байланыста болған.
Қырғыз Республикасының Сыртқы істер министрлігінің мәліметінше, ұсталған Әлішер Қасымов Қырғызстан азаматы емес. Қырғыз Республикасы президентінің 2014 жылғы жарлығына сәйкес республика азаматтығынан шыққан.
«Осыған байланысты бұл азаматтың құқығы мен заңды мүддесін қорғау мәселесі Қырғыз Республикасының Ресей аумағындағы дипломатиялық және консулдық мекемелерінің құзыретіне жатпайды», - деп қосты СІМ.
Еске сала кетейік, кеше Мәскеудің Басманский сотына тағы үш күдікті жеткізілген еді. Олардың бірі Диловар Исмолов террористерге делдал ретінде көмектесті деген айыппен ұсталған. Сондай-ақ ұсталғандар мінген «Рено» көлігінің түпкі иесі болып шықты.
Оған қоса Диловардың 62 жастағы әкесі Исроил Исмоилов пен оның 33 жастағы ағасы Аминчон Саломов қамауға алынды. Олар тағылған айыппен келіспей отыр.
Тергеушілердің нұсқасы бойынша, Диловар мен Аминчон 24 наурызда қамауға алынған Шамсиддин Фаридуниді қылмыстық топқа тартқан.
Еске салайық, 22 наурызда Мәскеу іргесіндегі «Крокус Сити Холл» концерт залында теракт болды. Қаруланған бірнеше адам «Пикник» тобының концертіне келушілерге оқ жаудырған еді. Теракт құрбандарының саны 139-ға жетті.
ФОТО: ИНТЕРНЕТТЕН
