«Жемқорлыққа қойылған ескерткіш» аталған LRT 2024 жылдың аяғына дейін аяқталады деп жоспарланып отыр. Бұл туралы Астана әкімі Жеңіс Қасымбек айтты.
Жеңіс Қасымбектің айтуынша, көлік жүйесі құрылысының келесі кезеңі 2022 жылы басталған. Жұмысты екі жыл ішінде аяқтау жоспарланып отыр.
«Алғашқы соманы былтыр үкімет бөлді. Биыл бұл нысанның құрылысы белсенді түрде жүргізіліп жатыр. Мобилизациялау жұмыстары, сондай-ақ LRT-де жұмыс істейтін болашақ пойыздар, техника бойынша аванстық төлемдер жүргізіліп жатыр. Жоба 2023-2024 жылдар аралығында жүзеге асырылады деп жоспарланған, келесі жылдың аяғына дейін іске қосылуы тиіс», - деді қала әкімі.
Астана әкімі «Биыл нысанның құрылысы белсенді түрде жүргізіліп жатыр» дегенмен, LRT-нің Қабанбай көшесі жағында құрылыс нышаны байқалмайды.
Еске салайық, Президент Қасым-Жомарт Тоқаев LRT құрылысы тоқтатылатын болса, шығын бұдан да көп болатынын айтқан болатын. «Мен LRT жобасының негізі қате болғанын айттым. Бірақ қазір басқа амалымыз жоқ. Біз бұл жобаны жүзеге асыруымыз керек», - деді ол. Үкімет құрылысты жалғастыруға қосымша 20 миллиард теңге бөлген еді.
MalimBlocks
