Алматы әкімі Дархан Сатыбалды Санкт-Петербург губернаторы Александр Бегловпен кездесті, деп хабарлайды Malim.kz.
Биыл Алматы мен Санкт-Петербург арасындағы серіктестік қатынастың орнағанына 30 жыл толды. Осы уақыт ішінде екі қала түрлі салада тұрақты байланыс орнатты. Кездесуде ынтымақтастықты одан әрі дамыту және бірлескен жобаларды жүзеге асыру мәселелері талқыланды.
Көлік инфрақұрылымын, соның ішінде жеңіл рельсті көлікті дамытуға ерекше назар аударылды. Алматы Санкт-Петербургтің қоғамдық көлік жұмысын ұйымдастыру тәжірибесіне қызығушылық танытып отыр.
Сондай-ақ тараптар мәдениет, туризм, білім, ғылым және ақпараттық технология салаларындағы ынтымақтастықты талқылады. Университеттер, мәдениет мекемелері мен салалық ұйымдар арасындағы тікелей байланысты кеңейту қажеттігі атап өтілді.
Кездесу қорытындысы бойынша ынтымақтастықтың нақты бағыттары бойынша жұмысты жалғастыру жөнінде уағдаластыққа қол жеткізілді.