Алматы тұрғындары арасында кене шаққан жағдайлар көбейіп келеді, деп хабарлайды Malim.kz.
Ресми дерекке сүйенсек, соңғы апталарда медициналық мекемелерге жүгінгендер саны 1142 адамға жеткен.
Қалалық санитариялық-эпидемиологиялық бақылау департаменті басшысының орынбасары Әсел Қалыкова қазіргі көрсеткіш өткен жылдың осы кезеңімен салыстырғанда 19 пайызға жоғары екенін мәлімдеді.
Бұған дейін, небәрі 19 күн бұрын 334 жағдай тіркелген. Оның жартысына жуығы 14 жасқа дейінгі балалар болған.
Әлеуметтік желілерде қала тұрғынының бірі баласының кенені қала орталығындағы аулада, балалар алаңында жұқтырғанын жазған.
Оның айтуынша, балалар ауруханасына барған кезде кезекте дәл осындай жағдайға тап болған тағы алты бала болған.
Мамандардың айтуынша, биыл жылы көктемге байланысты жәндіктердің белсенділік маусымы әдеттегіден ерте басталған. Алғашқы жағдайлар наурыз айының басында тіркеле бастаған.
Сонымен қатар, жалпы көрсеткіш көпжылдық орташа деңгейден аса қоймағаны айтылады. Дәрігерлердің мәліметінше, медициналық көмекке жүгінгендердің барлығына дер кезінде қажетті ем көрсетілген. Қажет болған жағдайда кенеге қарсы иммуноглобулин егілген.
Кене қай жерлерде жиі кездеседі
Сауалнама нәтижесіне сәйкес, кене шаққан жағдайлар көбіне мына жерлерде болған:
– жеке үйлердің аумағында – 37,2%
– қала сыртында (Алматы, Жетісу облыстары және басқа өңірлерде) – 35,2%
– Алматы маңында – 18,9%
– абаттандырылған тұрғын үйлер маңында – 4,8%
– саябақтар мен скверлерде – 3%
Осылайша, қауіп негізінен жеке сектор мен табиғи аймақтарда жоғары болып отыр.
Айта кетейік, Алматының маңайы кене арқылы таралатын инфекциялар жиі кездесетін эндемиялық аймаққа жатады. Бұл жәндіктер Кене энцефалиті мен Кене боррелиозы сияқты қауіпті ауруларды тасымалдайды.