Қазақстан Республикасының Сыртқы істер министрлігі Новороссийск теңіз порты акваториясында халықаралық Каспий құбыр консорциумының (КҚК) стратегиялық инфрақұрылымына бағытталған кезекті шабуылға байланысты ресми наразылық білдірді, деп хабарлайды Malim.kz.
Ведомствоның мәлімдеуінше, бұл — халықаралық құқық нормаларымен қорғалатын азаматтық нысанға жасалған үшінші агрессиялық әрекет.
Қазақстан жаһандық энергетикалық нарықтың жауапты қатысушысы ретінде энергия тасымалдау жүйесінің тұрақты және үздіксіз жұмыс істеуіне ерекше мән беретінін атап өтті. Министрлік КҚК-ның әлемдік энергетикалық тұрақтылықты қамтамасыз етудегі рөлін ерекше белгіледі.
Сонымен қатар, бұл оқиға Қазақстан мен Украина арасындағы екіжақты қатынастарға зиян келтіретін әрекет ретінде бағаланатыны айтылды. Қазақстан тарапы украин тарапынан мұндай жағдайлардың қайталануына жол бермеу үшін нақты шаралар қабылданатынын күтетінін жеткізді.