Франция президенті Эмманюэль Макрон Еуропа елдерінің көшбасшыларын АҚШ-қа қарсы Еуроодақтың мәжбүрлеуге қарсы құралын (Anti-Coercion Instrument, ACI) іске қосуға үндеді, деп хабарлайды Malim.kz DW-ге сілтеме жасап.
Мұндай қадам АҚШ-тың Гренландияға байланысты Еуропа елдеріне баж салығын енгізу жоспарына жауап болуы тиіс. Бұл туралы жексенбі, 18 қаңтарда AFP және dpa агенттіктері дереккөздерге сілтеме жасап хабарлады.
ЕО-ның «сауда базукасы» бұрын қолданылмаған
ACI — Еуропалық одақ алдын ала әзірлеген тетік. Ол ЕО-ға саяси қысым көрсеткен елдерден келетін тауарлар мен қызметтердің импортын жедел шектеуге мүмкіндік береді. Бұған дейін бұл құрал ешқашан қолданылмаған.
Макронға жақын дереккөздердің айтуынша, Париж Вашингтонның бұл әрекеттерін «жол беруге болмайтын қоқан-лоққы» деп санайды. Сонымен қатар Франция президенті 2025 жылғы шілдеде Брюссель мен Вашингтон арасында жасалған сауда келісімін қайта қарау қажеттігін де көтерген.