Malim.kz
Қоғам

"Мына ісің ұят болды": Марат Омаров Нұрлан Өнербаевтың видеосын шығарып, ренішін айтты

• Мадияр Қапанбек
Марат Омаров пен Нұрлан Өнербаев. Фото-коллаж: Malim.kz / ЖИ

Белгілі композитор, әнші Марат Омаров әлеуметтік желіде Нұрлан Өнербаевқа қатысты жазба жариялап, оның айтқан сөзіне наразылық білдірді. Сазгер әріптесін өзгенің шығармашылық еңбегін құрметтеуге шақырып, өнер адамы үшін ар мен абыройдың маңызды екенін айтты, деп хабарлайды Malim.kz.

Марат Омаров Instagram парақшасында өзіне жіберілген бейнежазбаға қатысты пікір білдірген. Композитордың айтуынша, видеода Нұрлан Өнербаев әннің авторы мен сөзін жазған ақынға қатысты пікір айтқан.

"Бұл кімнің әні екен, сөзін кім жазды екен? Елдің онда шаруасы жоқ", – деген Нұрлан Өнербаев бейнежазбада.

Аталған сөз Марат Омаровтың наразылығын тудырған. Композитор әріптесінің пікірін сынға алып, әннің авторын құрметтеудің маңызын атап өтті.

"Маған осындай видео келді. Мына ісің ұят болды. Өзгенің еңбегін өз атынан иемдену – өнер адамына сын. Ар мен абырой бәрінен биік болуы керек!" – деп жазды Марат Омаров.

Еске сала кетейік, бұған дейін Марат Омаров ел арасында кеңінен танылған "Анашым" әніне қатысты дау туралы пікір білдірген.

"Анашым" әніне қатысты дау: Марат Омаров Нұрлан Өнербаевқа не үшін ренжігенін айтқан еді

Бұған дейін белгілі композитор Марат Омаров журналист Аман Тасығанның TalkLike бағдарламасына берген сұхбатында "Анашым" әніне байланысты туындаған келіспеушілік туралы пікір білдірген еді. Композитор Нұрлан Өнербаевтың аталған шығарманы кейінгі уақытта орындамай жүруінің себебін түсіндіріп, ән авторларының оған реніш білдіргенін айтқан болатын.

Оның сөзінше, Нұрлан Өнербаевқа "Анашым" әнін орындауға ешкім ресми түрде тыйым салмаған. Алайда шығарманың авторларының есімі аталмай, еңбегі ескерусіз қалғандықтан, араларында түсініспеушілік туындаған.

"Бәрің Нұрлан Өнербаевтың ғана әңгімесін естіп жүрсіңдер. Біз оған тыйым салған жоқпыз. Мен бармын, басқа авторлар бар. Біз тек ренішімізді айттық. Әнді айтқанда авторларды неге хабарламайсың деп ескерткенбіз. Өнербаев соған тырысып, айтпай қалды. Әйтпесе ешкім оған заң жүзінде бұл әнді айтпа деп тыйым салған жоқ", – деген еді Марат Омаров.

Сазгер әннің халық арасында кеңінен таралуына Нұрлан Өнербаевтың үлес қосқанын жоққа шығармаған. Дегенмен туындыны дүниеге әкелген композитор мен ақынның еңбегі де ұмыт қалмауы керектігін атап өткен. Сұхбат барысында Марат Омаров "Анашым" әнін Нұрлан Өнербаевқа алғаш өзі үйреткенін де мәлімдеген болатын. Оның айтуынша, әншінің орындау мәнерін қалыптастыруға көмектесіп, шығарманың интонациясын түзеткен.

"Халық сүйіп тыңдайтын, Нұрлан Өнербаевтың әні деп қабылдайтын туындыны оған өзім үйреттім. Интонациясын дұрыстадым. Ол нота білмейді, музыкалық сауаты жоқ адам", – деп айтқан еді композитор.

Марат Омаров сол сұхбатында әнге қатысты келіспеушіліктің негізгі себебі шығарманы орындауға рұқсат беру емес, авторлардың еңбегіне құрмет көрсету мәселесі болғанын түсіндірген.

"Мен ешқандай тыйым салған жоқпын. Өнербаевқа ән авторларының өкпесі қара қазандай", – деген болатын өнер иесі.

Марат Омаров кім?

Марат Әбдіұлы Омаров – қазақстандық танымал әнші, композитор, Қазақстанның еңбек сіңірген әртісі және Қазақстан композиторлар одағының мүшесі. Ол "Анашым", "Әке арманы", "Алғашқы махаббат", "Қыз сыны", "Сыңарым" және "Әнші балапан" секілді халық арасында кеңінен танылған әндердің авторы.

Марат Омаров 1959 жылы 16 сәуірде қазіргі Түркістан облысы Созақ ауданының Шолаққорған ауылында дүниеге келген. 2026 жылы 67 жасқа толды.

Өнерге жастайынан қызығушылық танытқан болашақ композитор 1977-1979 жылдары Шымкент облыстық филармониясының "Ауылым – әнім" ансамблінде әнші болып еңбек етті. Осы кезеңде кәсіби сахнадағы алғашқы қадамдарын жасап, орындаушылық шеберлігін шыңдады.

1980-1985 жылдары Әл-Фараби атындағы мәдени-ағарту институтында білім алды. Кейін 1986-1990 жылдары Қазақ телевизиясында музыкалық редактор қызметін атқарды.

Марат Омаров шығармашылық жолында көптеген ән жазып, қазақ эстрадасының дамуына үлес қосты. Әсіресе Нұрлан Өнербаевтың орындауындағы "Анашым" әні кеңінен танылып, халықтың сүйікті шығармаларының біріне айналды.

Композитордың "Әке арманы", "Алғашқы махаббат", "Қыз сыны" және басқа да туындылары түрлі орындаушылардың репертуарынан орын алды.

Өнер иесі республикалық және халықаралық байқауларда да жетістіктерге жетті. Атап айтқанда, "Жігер-87", "Ыстықкөл-89", "Бұқара-90", "Азия дауысы-95", "Алтын диск-97" және "Каир-2003" фестивальдері мен байқауларының лауреаты атанды.

Сонымен қатар Марат Омаров қоғамдық және шығармашылық жобаларға да белсенді араласты. 1992 жылы "Наурыз" шығармашылық қорын, ал 1998 жылы «Балаларды дамыту» қорын құрды.

2001 жылдан бастап Астанадағы Президент оркестрі мен филармонияда қызмет етті.

1995 жылы өнер саласындағы еңбегі үшін Марат Омаровқа "Қазақстанның еңбек сіңірген әртісі" құрметті атағы берілді. Сондай-ақ Қазақстан Жастар одағы сыйлығының лауреаты атанды.

Нұрлан Өнербаев кім?

Нұрлан Әлтайұлы Өнербаев – қазақстандық танымал әнші, актер, мемлекет және қоғам қайраткері, Қазақстанның еңбек сіңірген әртісі және еңбек сіңірген қайраткері. Ол "Анашым", "Сағыныш", "Әке арманы", "Ауылым" және басқа да әндерді орындап, көпшілікке кеңінен танылған.

Нұрлан Өнербаев 1961 жылы 4 қарашада қазіргі Түркістан облысының Төле би ауданында дүниеге келген. 2026 жылы 65 жасқа толды.

Өнердегі алғашқы қадамын әншіліктен емес, актерлік саладан бастаған. 1980 жылы Мұхтар Әуезов атындағы Қазақ мемлекеттік академиялық драма театры жанындағы актерлер студиясын тәмамдаған. 1980-1991 жылдар аралығында Мұхтар Әуезов атындағы академиялық драма театрында актер болып еңбек етті. Осы кезеңде түрлі спектакльдерге қатысып, бірнеше сахналық образды сомдады.

Театрда жұмыс істеп жүрген жылдары әншілік өнерге де қызығушылық танытып, 1980 жылдардың ортасынан бастап эстрада сахнасына шыға бастады. Қоңыр дауысы мен өзіндік орындау мәнері арқылы тыңдарман ықыласына бөленді.

Нұрлан Өнербаев әншілік және актерлік қызметімен қатар, радио мен телевизия саласында да еңбек етті. Әр жылдары Қазақ радиосында басшылық қызмет атқарып, "Хабар" агенттігінде жұмыс істеді. Сондай-ақ Қазақстан Республикасы Президенті оркестрінің жетекші солисі және шығармашылық ұжымның көркемдік жетекшісі болды. 2000 жылы Абай атындағы Қазақ ұлттық педагогикалық университетінің заң факультетін бітіріп, заңгер-құқықтанушы мамандығын меңгерді.

Өнер иесі мемлекеттік қызмет саласында да еңбек еткен. Алматы қаласының мәдениет саласындағы басқару құрылымына жетекшілік етіп, 2008-2011 жылдары Қазақстан Республикасы Парламенті Мәжілісінің депутаты қызметін атқарды.

Шығармашылық жетістіктері үшін 1995 жылы Қазақстанның еңбек сіңірген әртісі атағына ие болды. Сол жылы "Дарын" мемлекеттік жастар сыйлығының лауреаты атанды. Ал 2008 жылы Қазақстанның еңбек сіңірген қайраткері құрметті атағын алды.

Мадияр Қапанбек
Автордың басқа материалдары