Николя Саркози 2012 жылғы сайлау науқаны шығындарын асыра көрсету ісі бойынша шартты түрде мерзімінен бұрын босатылды. RTL медиакомпаниясының 6 мамыр, сәрсенбі күні дереккөздерге сілтеме жасап хабарлауынша, сот 71 жастағы Саркозидің жасына байланысты жаза шарттарын жеңілдету туралы өтінішін қанағаттандырған. Шешім 7 мамырдан бастап күшіне енеді.
Әңгіме Саркозидің 2012 жылғы сайлауалды науқанына қызмет көрсеткен Bygmalion PR-агенттігіне қатысты іс туралы болып отыр. Сот саясаткердің партиясы Bygmalion-нан 18 миллион еуродан астам қаражат алғанын және бұл соманың ресми шығындар ретінде есепке алынбағанын анықтап, Саркозиді бір жылға бас бостандығынан айырды.
Кейін жаза мерзімі алты айға дейін қысқартылып, түрме жазасын электронды білезік тағумен алмастыруға мүмкіндік берілді. RTL мәліметінше, енді саясаткер электронды білезік тақпайтын болады.
Саркози тағы екі қылмыстық іс бойынша кінәлі деп танылған
Николя Саркози Франция президенті қызметін 2007 жылдан 2012 жылға дейін атқарды және нақты түрме жазасын алған алғашқы бұрынғы мемлекет басшысы атанды.
Bygmalion ісі бойынша үкімнен бөлек, 2021 жылғы наурызда саясаткер Франция Кассациялық сотының қызметкеріне пара беру және жемқорлық ісі бойынша кінәлі деп танылды. Сол кезде Саркози бір жыл түрме жазасына және тағы екі жыл шартты жазаға кесілді. Алайда нақты жаза ішінара үйқамақпен және электронды білезік тағумен алмастырылды.
2025 жылғы қыркүйекте Николя Саркози 2005–2007 жылдары Муаммар Каддафи үкіметі тарапынан оның сайлауалды науқанын қаржыландыру ісі бойынша қылмыстық сөз байласуға қатысты кінәлі деп танылды.
Жаза ретінде сот оған үкімнің орындалуын кейінге қалдыра отырып, бес жыл бас бостандығынан айыру жазасын тағайындады. 2025 жылғы қазанда Николя Саркози түрмеде 20 күн өткізіп, кейін сот бақылауымен босатылды. Қазіргі уақытта сот бұл іс бойынша апелляцияны қарастырып жатыр.