Шымкентте Нұрай Серікбайдың өліміне қатысты істі тергеген полиция қызметкерінің әрекеті бойынша қылмыстық іс қозғалды, деп хабарлайды Malim.kz.
Шымкент қаласы Полиция департаментінің мәліметінше, қылмыстық іс тергеуші Әбілғазы Артықбайға қатысты қозғалған. Қазір тергеу амалдары жүргізіліп жатыр.
Бұған дейін сот отырысында Нұрай Серікбайдың ағасы Сұлтан Серікбай тергеушінің жұмысына қатысты бірқатар шағым айтқан болатын.
Оның сөзінше, Нұрайды ұрлап, тұрмысқа шығуға мәжбүрлегені туралы ақпарат түскеннен кейін оқиға орнына барған Әбілғазы Артықбай Шерхан Аймаханның туыстарымен бірге шай ішіп, бауырсақ жеген. Сондай-ақ марқұмға тергеуші тарапынан қысым көрсетілгенін айтқан.
Сотта тергеушіден жауап алған судья полиция бөлімінде Нұрайдың бейнежазбаға түсірілгеніне де назар аударды. Алайда бұл видео іс материалдарына тіркелмеген. Сонымен қатар Нұрайдан бейнежазбаға түсуге жазбаша келісім алынбағаны анықталған.
Полиция департаменті тергеушінің әрекетіне байланысты қылмыстық іс қозғалғанын растады. Қазіргі уақытта істің мән-жайы анықталып жатыр.
Ведомство тергеу барысына қатысты өзге ақпараттың жарияланбайтынын мәлімдеді.
Әбілғазы Артықбай қазіргі уақытта тергеуші қызметін атқармайды.