Желі қолданушысы Әсет Ақмолда марқұм актер Сағи Әшімов туралы әсерлі естелігімен бөлісті. Ол жазбасында Асанәлі Әшімовтің күнделігіндегі ұлына қатысты жазбаларды жариялаған, деп Malim.kz тілшісі Ozgeris.info сайтына сілтеме жасап хабарлайды.
Айта кетейік, 18 шілде – өмірден ерте өткен Сағи Әшімовтің туған күні. Осыған орай Әсет Ақмолда актердің Германияда ем қабылдап жүрген кезінде түсірілген суретін және әкесінің күнделігіндегі естеліктерді көпшілік назарына ұсынды.
Күнделіктегі алғашқы жазбалардың бірі 1999 жылғы 22 қыркүйекте жазылған. Онда Асанәлі Әшімов Германияда жүрген ұлының операция алдында қорқып тұрғанын айтқанын еске алады.
"АСАНӘЛІ ӘШІМОВТІҢ КҮНДЕЛІГІНЕН:
22.09.99
Сағи Германиядан телефонда: "Операцияға бара жатырмын, қорқам", – деп көңіл күйімді төмендетті.***
27.09.99
Күз. Көңіл күйім де күзгі күндей. Майра мен сүйікті Мәдиімді қара жер алып кетті. Екеуі де өкінішті өлім. Жүректегі жарақат жазылмастай боп орналасты.***
18.10.99
Сағиым үйге келіп, апаммен шешіліп әңгімелесіп отырған үстіне келдім. Таңданып: "Мұндай уақытта келе бермеуші едің", – дедім.
"Аға! Үйге қонғалы келдім", – деді.
Ваннаға түсіп, әбден тазаланып, бөлек бөлмеге төсек салып жатып қалды. Содан тұрмай қалды ғой құлыным… Мен үшін әлі де жұмбақ?!***
2.11.99
Мәди, Сағи, Майра үшеуі туралы естелік бастадым, ағытылып барам, қолым сырғып отыр.***
5.11.99
Ауруханадамын. Таңғы 8.30-да Сағидың "Ағау" деген даусынан ояндым. Сөйтсем, УЗИ-ге баратын уақытым екен.***
05.01.2000
Мәдиге бүгін бір жыл.
Майра, Мәди, Сағилардың басына барып құран оқып, гүл қойып қайттық. Катерина Ивановна, Мәдидің үй-іші.
Офиске үстел даярладым. Шота келіп, өмірі жасамаған мінез көрсетіп, 2000 теңге шығарып Игорьға берді. Түсте офиске Қасейінов, Смайылов, Кенжебаев т.б. келді. Мәдиді еске алдық.***
30.03.2000
Майра түсіме жиі кіреді. Енді мені алып кетейін деп жүр ме?! Кім білсін?! Рухы күшті екен, екі баласын бір жылда алып алды.***
18.07.2000
Құлыным Сағидың туған күні. "Сағи" кафесінде болдым. Сағидың 39 жылдығын өткіздік. "Аға, бүгін менің туған күнім ғой" деп маған ескерту жасағанда, "Мен кейде өз туған күнімді де ұмытам" дейтін едім. Бала сияқты сыйлық күтіп тұратын еді, жарығым. Қалтасындағыны аямай шашып жүретін, 100% ақкөңіл еді, періште күйінде кетті. Көрген түстей жарқ етті де жоқ болды…***
04.11.2000
Сағи түсіме жиі кіреді. Бүгін «Аға, есть новости» деп күліп тұр.***
30.03.2001
Сағинаға қырық күн.
Майра, Мәдидің, Сағидың басына барып, құран оқып қайттым. Алтындарым қозғалар емес..."
Бұл жазба Әсет Ақмолданың әлеуметтік желідегі парақшасынан алынды.