Ақмола облысында полицейлерге дер кезінде хабар беріп, құқықбұзушылықтың алдын алуға көмектескен 10 жастағы оқушы Алан Колмагоров марапатталды, деп хабарлайды Malim.kz.
Полицияның мәліметінше, Алан жүргізушінің мас күйде көлік айдап жүргенін байқап, 102 нөміріне дереу қоңырау шалған. Баланың көлік маркасы, түсі және мемлекеттік нөмірі туралы нақты ақпарат беруінің арқасында патрульдік полиция күдіктіні жедел ұстаған. Тексеру барысында көліктің ұрланғаны анықталды.
28 қараша күні облыстық полиция департаментінің басшылығы Көкшетау қаласындағы №12 мектепке барып, жасөспірімге азаматтық белсенділігі үшін алғыс хат пен естелік сыйлықтар табыстады. Марапат баланың анасына да берілді.
Полициядағылар Аланның әрекеті жол-көлік оқиғасының ауыр салдарының алдын алуға көмектескенін атап өтті. Бала өзінің полицияға хабар беру туралы шешімді қауіпсіздік үшін қабылдағанын айтқан.
Жасөспірім биыл 16 желтоқсан – Тәуелсіздік күні қарсаңында 11 жасқа толады.