Президент Қасым-Жомарт Тоқаев 2027 жылғы 1 қаңтардан бастап Қазақстанда ең төменгі жалақы мөлшерін 85 мыңнан 100 мың теңгеге дейін арттыруды тапсырды. Сонымен қатар медицина саласындағы 77 мыңнан астам маманның еңбекақысы 40 пайызға дейін өседі, деп хабарлайды Malim.kz.
Бұл туралы Мемлекет басшысы 28 қазанда Қазақстан халқына арнаған Жолдауында мәлімдеді.
Президент халықтың табысын арттыру және алғашқы медициналық-санитарлық көмек жүйесін жетілдіру мәселесіне ерекше тоқталды.
"Сондай-ақ біз алғашқы медициналық-санитарлық көмек жүйесін жаңғырту ісіне ерекше мән береміз.
Осы тұрғыдан алғанда, жалпы практика дәрігерлерінің өкілеттігін кеңейтіп, бұл жүйені қаржыландыру көлемін кезең-кезеңімен ұлғайту маңызды.
Үкіметке келер жылдың 1 қаңтарынан бастап осы бағытта жұмыс істейтін учаскелік қызмет мамандарының жалақысын үздіксіз еңбек өтіліне қарай 40 пайызға дейін арттыруды тапсырамын. Бұл 77 мыңнан астам маманның табысын өсіруге мүмкіндік береді.
Сонымен қатар біз жалақының ең төменгі мөлшерін кезең-кезеңімен көбейте береміз. Мен Үкіметке ең төменгі жалақы мөлшерін 85 мыңнан 110 мың теңгеге дейін көтеруді тапсырамын.
Осы міндет келесі жылдың 1 қаңтарынан бастап іске асырылуға тиіс. Бұл 1,8 миллион адамның, соның ішінде бюджеттен жалақы алатын 370 мыңнан астам қызметкердің табысын арттыруға ықпал етеді", – деді Мемлекет басшысы.